Oqu-aǧartu ministrı Ǧani Beisembaevtyŋ mektep oquşylarynyŋ hidjabyna bailanysty aitqan pıkırı äleumettık jelıde synǧa qaldy. Sodan tuyndaǧan sūraqtardy elımızge belgılı ūstazdarǧa qoiyp kördık.
Keşegı Ükımet otyrysynan keiın tılşılerdıŋ hidjap turaly sūraǧyna Oqu-aǧartu ministrı Ǧani Beisembaev «Zaiyrly memleket bolǧannan keiın zaiyrly memlekettıŋ zaŋyn oryndauǧa tiıstımız. Jalpy, bız mektepte bılım daǧdylaryn qalyptastyrǧan kezde bızdıŋ memlekettıŋ zaŋdaryna säikes, oqu prosesı sol jerdegı üderıste jürgızılu kerek. Sondyqtan da zaŋ qai memlekettık organda bolsa da qataŋ saqtaluǧa tiıstı. Bız osy zaŋ jolymen jüretın bolamyz», - degen. Ministr jauabynan keiın de saualdar tuyndaǧan.
Aita ketu kerek, Beisembaev myrza biyl ministr retınde bırınşı ret oqu jylyn qarsy almaq.
«BÜGIN – HİDJAB, ERTEŊ JŪMA NAMAZY MA?»
«Ziiatker-Ūstaz» qoǧamdyq bırlestıgınıŋ töraǧasy Ömır Şynybekūlynyŋ aituynşa, ministrge hidjapty jaqtaityndar qysym jasauy mümkın. Ūstaz äleumettık jelıde taraǧan videoda Beisembaevtyŋ taisaqtap tūrǧanyn baiqaǧanyn aŋǧarǧan.
- Menıŋ oiymşa, Ǧani Beisembaev dındarlarǧa bailanysy joq «svetskii» adam sekıldı. Oǧan qysym jasap jatqan bır küşter bar sekıldı. Mūnyŋ anyǧyn Alla bıledı. Ministrdıŋ taisaqtap tūrǧanyna qarasaq, elde äsıredınşılderdıŋ desı basym bolyp ketken sekıldı. Bıraq olardy qolmen eşkım ūstap alǧan joq. Bilıktıŋ joǧary basşylyǧynda solarǧa büirek būratyn adamdar bar deidı ǧoi, - deidı Ömır Şynybekūly.
- Al endı hidjapqa keletın bolsaq, bızde arnaiy bekıtılgen mektep formasy bar. Eger är dın ökılı özınıŋ kiımın kie beretın bolsa, onda ne bolady? Mektepten keiın bılgenderın ıstesın, öz qalauy boiynşa jüruıne bolady. Äitse de Ata zaŋda «Zaiyrly memlketpız» dep anyq jazylyp tūr ǧoi. Odan artyq ne kerek? Eger hidjapqa rūqsat beretın bolsaq, mektebımızdı ūstai almai qalamyz. Bälenıŋ bärı mektepten bastalady. Bügın hidjabqa rūqsat berse, erteŋ jūma namazyn oquǧa rūqsat beredı. Eger bız Kostitusiiaǧa qaişy bır äreketke rūqsat beretın bolsa, mūny ūstai almai qalamyz, – deidı ol.
Ömır Şynybekūly kezınde būrynǧy ministrmen de, qazırgı ministrımen de jüzdeskenın aitady.
- Ashat Aimaǧambetovpen de, Ǧani Beisembaevpen de kezdesken bolatynmyn. Ekeuı bır bırıne ūqsamaityn adamdar. Būl jerde mınez emes, qalai bolǧanda da zaŋ saqtalu kerek. Balabaqşadan bastap, mektep, joǧary oqu oryndary bızdıŋ Konstitusiiamyzǧa baǧynu kerek. Onyŋ şegınen şyǧuǧa bolmaidy. Saiasi reforma bolmasa,ministrlerdıŋ bastary bailauly ekenın körıp otyrmyz ǧoi. Ol üşın sottan bastap deputattarǧa deiın täuelsız boluy kerek, – deidı ol.
«18 JASTAN KEIIN ÖZ ERKI..»
Al belsendı ūstazdardyŋ bırı Aiman Saǧidulla mektep oquşylarynyŋ hidjap kigenın qoldamaitynyn aitady.
- Men mektepte oquşylardyŋ hidjap kiiuıneqarsymyn. Mektep memlekettık mekeme ärı bız zaiyrly memlekette ömır süretınımızdı ūmytpauymyz kerek. Qalasa, hidjapty üiınde,nemese köşede kisın, bıraq 18 jasqa deiıngı mektep oquşysyna hidjap kigızu dūrys emes. Memlekettıŋ arnaiy zaŋmen bekıtıp bergen mektep formasy bar, oquşylar sol kiımdı kiiuı kerek. Öitkenı bala öz erkımen kiıp jatyr ma, joq älde zorlyqpen kiıp jatyr ma, bız ony anyq bılmeimız. Öz oiy älı dūrys qalyptaspaǧan 18 jasqa deiıngı bala ata-ananyŋ yqpalymen jüredı. Al 18 jastan keiın hidjap kie me, kimei me, ol jaǧyn özı bıledı, – deidı ūstaz.
Sondai-aq ol Ǧani Beisembaev Oqu-aǧartu ministrı bolyp kelgelı, atalǧan vedomstvanyŋ esıgı «jabylyp» qalǧanyn aitady. Sondyqtan da ol Ashat Aimaǧambetov pen Ǧani Bektaiūlyn salystyruǧa bolmaitynyn eskerttı.
- Äleumettık jelıde qanşama mäselenı köterıp,jazyp jatyrmyz, bıraq jaŋa ministr bır de bıreuıne jauap bergen emes. Jauap beruge qūzyretı jetpei me, joq älde mensınbei me, ol jaǧyn naqty bılmeimın. Ol kısı mülde jabyq bolyp otyr. Belsendı mūǧalım retınde qanşa mäsele kötsersek te ol jauapsyz qalyp jatyr, - deidı Aiman Saǧidulla.
- Şyny kerek, Ashat Aimaǧambetov pen Ǧani Beisembaevty salystyrsaq, ekeuı aspan men jerdei. Jalpy ekı azamatty ministr retınde salystyrudyŋ özı dūrys emes. Öitkenı ekeuınıŋ ıs-äreketı aspan men jerdei. Aimaǧambetov köp närsenı şeşuge, halyqpen dialogta boluǧa ūmytyldy, al qazırgı ministrde ondai talpynys joq, – deidı belsendı ūstaz.
Serık Joldasbai
«Adyrna» ūlttyq portaly
