Taldyqorǵanda 3 jasar balany uryp óltirgen 24 jastaǵy turǵyn 10 jylǵa sottaldy. Bul týraly Jetisý oblystyq soty baspasóz qyzmeti málimdedi, dep habarlaıdy “Adyrna” ulttyq poratly.
"Kináni jeńildetetin mán-jaǵdaılardy, ıaǵnı sottalýshynyń buryn sotty bolmaǵandyǵyn, shyn júrekten ókinýin, jábirlenýshiniń ony keshirýin jáne kináni aýyrlatatyn mán-jaılardyń joqtyǵyn eskere otyryp, sot sottalýshyǵa 10 jylǵa bas bostandyǵynan aıyrý jazasyn taǵaıyndady. Jazany qylmystyq-atqarý júıesiniń ortasha qaýipsiz mekemesinde óteý belgilendi", - dedi Jetisý oblystyq soty baspasóz qyzmetiniń ókili Nursultan Orynbasarov.
Aıta keteıik, 2022 jylǵy qyrkúıekte Taldyqorǵandaǵy aýrýhananyń birinde 3 jasar bala kóz jumdy. Dárigerler balaǵa bas jaraqaty dıagnozyn qoıǵan.
Sábı ólimine qatysy bar degen kúdikpen osy balany qarap-baqqan 23 jastaǵy jergilikti turǵyn ustaldy. Boıjetken ÝUI-ǵa qamaldy, biraq qalalyq sot kúdiktige "úı qamaǵy" sankııasyn berdi. Alaıda, kúdikti keıin qaıtadan túrmege toǵytyldy.
"Úıqamaqqa jiberilgen kúdikti buǵan deıin sottalmaǵan, kinásin tolyq moıyndaǵan, tergeýden qashpaǵan, turǵylyqty jeri bolǵan. Osyny negizge alyp, sot ony úıqamaqqa jibergen. Bul jerde biz sottyń sheshimin zańsyz dep sanamaımyz, biraq negizsiz dep sanaımyz. Sol sebepti, qylmys aýyr sanatqa jatatyndyqtan, kúdikti qoǵam úshin qaýipti bolýy múmkin. Soǵan sáıkes, biz prokýratýra tarapynan sottyń kúdiktini úıqamaqqa jibergen sheshimimen kelispeı, qaıta kúdiktini qamaýǵa alý jóninde ótinish hat joldadyq. Sot bizdiń ótinishimizdi qanaǵattandyryp, kúdiktini qaıta qamaýǵa alý jóninde sheshim shyǵardy", - degen edi qala prokýrory Baqytjan Asheev.
Atalǵan fakti boıynsha saraptama taǵaıyndala otyryp, tergeý QR QK 106-baby 3-bóligi (abaısyzda jábirlenýshiniń ólimine ákep soqqan densaýlyqqa qasaqana aýyr zııan keltirý) negizinde júrgizildi.
