Búgin Taldyqorǵan qalasyndaǵy Jetisý oblysynyń qylmystyq ister jónindegi mamandandyrylǵan aýdanaralyq sotynda Sherzat Polattyń ólimine qatysty is boıynsha aldyn ala tyńdaý bastaldy, dep habarlaıdy "Adyrna" ulttyq portaly Ulysmedıaǵa siltep.
Sot otyrysyna 9 sottalýshy men olardyń qorǵaýshylary keldi. Joǵarǵy sottyń kommýnıkaııa bóliminiń meńgerýshisi Perızat Sádýaqastyń aıtýynsha, isti sýdıa Erjan Serikqazyuly Januzaqov qarap jatyr.
Jýrnalıster tarapynan sottyń dál osy jerde ne sebepti ótip jatqany jóninde suraqtar qoıyldy.
"Bul — qylmystyq is bolǵandyqtan, isti qylmystyq ister jónindegi aýdanaralyq sot qaraıdy. Ákimshilik nemese azamattyq sottar mundaı isterdi qaramaıdy", – dep túsindirdi sýdıa Sádýaqas.
Ol sondaı-aq, keńirek zaldyń qarastyrylmaǵany jónindegi jýrnalısterdiń narazylyǵyna baılanysty, bul usynysty jergilikti sot ókilderine jetkizetinin aıtty. Onyń sózinshe, 9 sottalýshy da Taldyqorǵandaǵy tergeý ızolıatorynda otyrǵandyqtan, sot osy jerde ótip jatyr.
Aıta keteıik, sot otyrysy ashyq formatta ótýde. Alaıda, aıyptalýshylardyń biri – kámeletke tolmaǵan jasóspirim bolǵandyqtan, sot ókilderi BAQ-tan onyń beınesin foto jáne vıdeoǵa túsirmeýdi surady.
2024 jylǵy 4 qazanda Talǵar qalasynda birneshe jigittiń 16 jastaǵy Sherzat Polatty jabylyp soqqyǵa jyǵyp, pyshaqtap óltirgeni qoǵamda úlken rezonans týdyrdy. Kýágerler oqıǵany vıdeoǵa túsirip, áleýmettik jelige júktegen. Qoǵam arasynda narazylyq kúsheıip, oqıǵanyń ádil tergelýin talap etkender kóp boldy.
Oqıǵadan keıin 12 qazanǵa qaraǵan túni marqumnyń otbasynyń úıi órtenip ketti. Týystary muny kúdikti taraptyń qasaqana jasaǵan áreketimen baılanystyrady.
