Qalamger Mańdaıly Qosymbaı qoqysqa tastalǵan qara qazan men berekeli besiktiń kıesin tanyp, sút pisirim ýaqytta úıine alyp ketken aqtaýlyq turǵyndardyń ulttyq qasıeti jaıly jazdy. Qalamgerdiń bir jaǵynan bul qubylysqa jany aýyryp, qalyń qazaqtyń qazynasyn kózdiń qarashyǵyndaı saqtaýǵa shaqyrdy, dep jazdy "Adyrna" ulttyq portaly.
Aqtaý qalasynyń turǵyny, qalamger Mańdaıly Qosymbaı kózi kórgen oqıǵa jaıly bylaı dep jazady:
- Qoqysqa kete jazdaǵan kıeli qara qazan men aq besik...Syrtqa shyqsam úıdiń qasyndaǵy qoqys jáshikteriniń qasyna bireý shyǵaryp tastaǵan myna qazan kózge birden shalyndy. Qaqpaǵynyń tap-tazalyǵyna qaraǵanda bulaı tastaı qoıatyndaı eski nárse emes. Shamasy ıesi ýaqtyly tazalanbaı maı sińip, ot qaryp, kúıelesh-kúıelesh bolyp qalǵan qazandy tazalaýǵa qıynsynyp shyǵaryp tastaǵandaı. Bálkim ydys-aıaǵyn jańartqan bolar.On-on bes mınýtta dúken sharýamdy bitirip, qaıtyp oralsam qazan ornynda joq, qudaı degen bir adam alyp ketken sekildi..Al kórshilerdiń biriniń balpanaqtaı úsh bóbegine jyly uıa bolyp, qanattandyrǵan myna besikti bizdiń Nurmuhan Jantórın atyndaǵy teatrdyń altyn qoldy sheber ustalary áp-ádemi etip qalpyna keltirip, rekvızıtke qosty! - dep qýanyshty jańalyqpen túıindedi avtor.
Avtordyń jazbasyna erekshe oqıǵany baıandaı otyryp jaýap jazyldy. Sárý Ermuhanova atty jeli qoldanýshysy erekshe oqıǵany baıandady:
- Máke, sálemetsiz be? Bizdiń Balalar Úıiniń tórinde osyndaı besik pen sandyq daladan taýyp alǵan tur. Bir ájeniń sandyǵy shyǵar, kózi ketkesin shyǵaryp tastaǵan. Qansha yrysy boldy eken sol sandyqta. Sol sandyqpen birge tabaldyryqtan Balalar Úıine de yrys kirdi.Qara qazan kıeli ǵoı, alǵan adamnyń yrysy mol bolady eken!
Mańdaıly Qosymbaıdyń aıtýynsha, qazaq úshin kıeli qundylyqtarymyzdy qabyldaıtyn ortalyqtyń bolǵany mańyzdy. Sonda atadan balaǵa mura esebinde kele jatqan qazan men besik dalada qalmaıdy:
- Ár oblys ortalyǵynda sondaı nárselerdi qabyldaıtyn bir oryn bolsa ǵoı.
Bireýge kerek emes nárse ekinshi bireýge kerek, ornyn tabar ma edi.Aýylda besikti saraıǵa aparyp, ilip qoıady. Qazanda maldyń jemi ne basqadaı kerekti-kerek emes zattar tura beredi.Qalada qıyn. Qazir kıim alatyn oryndar bar emes pe, onyń da qyzmetin paıdalanyp jatyr ... - dedi qalamger.
Oqyrmandar avtordyń jazbasyna qatysty pikir bildirýde:
"Ult salt-sanasynan bezine bastady.
Bul qaýip. Qudaı saqtasyn";"Qara qazan,altyn besik Qazaq úshin kıeli dúnıeler. Tastaýǵa bolmaıdy";
"Qazan men besikti laqtyrýǵa bolmaıdy. Qazandy bireýge berýge bolmaıdy, úıdiń qut-berekesi sol qazanda dep jatatyn úlken adamdar. Besikti de solaı qoqysqa tastaýǵa bolmaıdy. Qazaqtyń yrymdarynyń bári ras";"Qazandar metall qabyldaıtyn jerlerde kóp. Birde qazan joǵalyp ketip, sondaı metall qabyldaıtyn jerden taýyp alyp keldik" dep jazdy oqyrmandar.
"Adyrna" ulttyq portaly
