Qazaqstanǵa ózge elden qonys aýdarýshylar qazaq tili men salt-dástúrin úırenýi kerek. Sondaı-aq, el ekonomıkasyna paıdasyn tıgizýi qajet. Bul pikirdi Májilis depýtaty Gennadıı Shıpovskıh “Adyrna” ulttyq portalyna aıtty.
Qazaq tilinde múdirmeı sóıleıtin depýtattyń aıtýynsha, mıgranttardyń el ekonomıkasyna tıgizer paıdaly tustaryn da eskerý qajet.
“Árbir máseleniń eki jaǵy bolady. Durys jaǵy jáne burys jaǵy. Reseıden qonys aýdarýshy azamattar bolsyn, basqa el bolsyn, durys jaǵyn alyp qaraıtyn bolsaq, birinshiden, el ekonomıkasyna paıda tıgizetin tusyn oılaýymyz kerek. Máselen, elimizde bolmaǵan mamandyqtardyń mamandarynyń kelýi. Iaǵnı, jaqsy maıtalmandardyń kelýi elge paıdasyn tıgizer edi. Olar Qazaqstannyń mamandarymen tájirıbe almasady. Nátıjesinde biliktilik artyp, ekonomıkaǵa paıda tıgizer edi. Ony elimizde durys jaǵynan paıdalanýymyz qajet. Bul elimizdiń ekonomıkasyna taptyrmas tájirıbe ekeni sózsiz.
Men QR-nyń Parlament Májilisiniń 7-saılanym depýtaty bolyp júrgen kezde Qazaqstan Halqy Assambleıasynyń belsendi múshelerimen birlese otyryp, úndeý jasaǵan bolatynbyz. Sol kezde biz Reseıden qonys aýdarýshylar ǵana emes, basqa da sheteldik azamattarǵa eskerý kerek dúnıelerdi atap óttik. Olarǵa eger elimizge kelip, qonys aýdaryp nemese bir jumyspen kelip jatsańyzdar, sizder árqashan mynany bilýlerińiz kerek: Qazaq eliniń qazaq jeriniń tili, dini, mádenıeti jáne salt-dástúri ajyramas bólik jáne bizdiń qasterli dúnıemiz. Sony saqtaý, qurmetteý kerek!”, -dedi Gennadıı Shıpovskıh.
