Nurjigitovke Kenesary hannan kúıeý balasy mańyzdy bolyp tur

1099
Foto: Jambyl oblysynyń ákimdigi
Foto: Jambyl oblysynyń ákimdigi

Jambyl oblysyna qarasty Merki aýdanynda Kenesary hannyń eskertkishine qatysty daý 2-3 jyldan beri kóterilip keledi. Jergilikti turǵyndar óz qarjysyna ornatqan eskertkishti jergilikti bılik jaramsyz dep taýyp, turǵan jerinen alyp tastaǵan bolatyn. Asqar Myrzahmetovtyń kezinde bastalǵan daý Saparbaevtyń kezinde de sheshimin tappaı jańa ákim Nurjan Nurjigitovtiń qaraýyna ótip tur.

Kenesary hannyń eskertkishi jyr bolǵanda oblystyń burynǵy ákimi Berdibek Saparbaev jalpy quny 500-600 mln teńgege «Qazaq eline myń alǵys» jáne «Biz birgemiz» degen monýmentin ashsa, Nurjan Nurjigitov Dinmuhamed Qonaevqa eńseli eskertkishi ornatyp tastady. Bir qyzyǵy Han Kenege kelgende jergilikti bılikti tas júregi jibimeı-aq qoıdy. Osyndaıda «Aıbyny asqaq Kenesary hannan kommýnısttik partııanyń ókili Dinmuhamed Qonaev artyq pa?» degen zańdy suraq týyndaıdy? Joq álde bılik áli kúnge deıin «Han Keneniń eskertishin ornatsaq, Reseıdi renjitip alamyz» dep qorqa ma?

Al Kenesary hannyń eskertkishin salyp jatqan halyqtyń aıtýynsha, Mádenıet jáne sport mınıstrligi músindi qoıýǵa ruqsat bermeı otyrǵan kórinedi. Ortalyq kommýnıkaııalar alańynda Mádenıet komıteti tóraǵasynyń orynbasary Kúmis Seıitovaǵa «Han Keneniń eskertkishin qaraýdy komıtet nege sozyp jiberdi? Bıylǵy Kenesary hannyń 220 jyldyǵyna deıin eskertkishti ornatýǵa ruqsat beresizder me?» dep suraq qoıdyq.

«Jańa eskertkishti ornatýdyń óziniń erejesi bar. Ol erejege sáıkes jergilikti atqarýshy organnyń usynysy eki kezeńde qaralady. Birinshi kezeńde eskertkishtiń ıdeıasyn qoldaý jáne mınıstrliktiń janynan qurylǵan komıssııa ıdeıa qoldaý tapqannan keıin ornatylatyn eskertkishti kórkemdik jaǵynan qarastyrý úshin músinniń kishkene formasyn komıssııanyń qaraýyna ótkizedi. Komıssııa qaraǵannan keıin óziniń eskertpelerin berip nemese eskertpesiz maquldanǵan jaǵdaıda ǵana ornatýǵa ruqsat beredi. Sondyqtan men bul máseleni naqty aıta almaımyn. Biraq eger osy proedýra durys uıymdastyrylyp, jergilikti atqarýshy organnan usynys túsip jatsa, bıylǵy jyly túsken usynystar jyldyń aıaǵyna deıin qarastyrylyp, maquldanatyn bolady nemese qoldaý tappaǵan jaǵdaıda onyń sebebi aıtylyp, jaýaby joldanady», – dedi ol.

Sondaı-aq Kúmis Seıitovaǵa «Kenesarynyń 220 jyldyǵyna oraı Mádenıet komıteti nege aýqymdy is-shara uıymdastyrmady?» degen suraq qoıdyq.

«Bizde qoldanystaǵy Úkimettiń qaýlysy bar. Ol qaýlyǵy sáıkes aýqymdy respýblıkalyq deńgeıdegi shara 100 jyldyq jáne ár 25 jyl saıyn atalyp ótiledi. Sondyqtan 225 jyldyǵy qoldanystaǵy zańnama aıasynda atalyp ótiledi. Sonymen qatar Kenesary hanymyzdyń elimizge qosar úlesin eskere otyryp ár óńirde osy máselege baılanysty aýqymdy is-sharalar ótkizilip otyr», – dep jaýap berdi.

Negizi Han Keneniń eskertkish ornatýǵa Jambyl oblysy ákimi Nurjan Nurjigitov pen Merki aýdany ákimi Jorabek Baýbekov múddeli bolýy kerek edi. Eger jergilikti bılik tarapynan nıet bolsa, ony Mádenıet mınıstrligi birden maquldaıdy. Áıtse de Nurjan Nurjigitovty Kenesary hannyń eskertkishinen góri, týǵan kúıeý balasynyń máselesi qatty alańdatyp júrse kerek. Áleýmettik jeli belsendileri oblys ákiminiń týǵan kúıeýbalasy Sultan Marattyń Qordaı aýdany ákimdiginiń Sport jáne deneshynyqtyrý bólimine basshy bolyp taǵaıyndalǵanyn jazyp jatyr. Bir sózben aıtqanda Nurjan Moldııarulyna Kenesary hannyń eskertkishinen qaraǵanda kúıeý balasynyń máselesi mańyzdy bolyp tur.

Serik Joldasbaı

Pikirler
Uqsas jańalyqtar