Jambyl oblysynda kämeletke tolmaǧan balany öz-özıne qol jūmsauǧa deiın jetkızu deregı boiynşa üş adamǧa qatysty sot ükımı şyqty. Būl turaly oblystyq prokuratura mälımdedı, dep habarlaidy “Adyrna”.
Tergeu barysynda 7–11 synyp oquşylary arasynda beiresmi köşbasşylardyŋ paida bolyp, «köşelık tärtıppen ömır süru» ūstanymdarynyŋ qalyptasqany anyqtalǧan. Mūndai qūbylys kei jaǧdaida jasöspırımder arasynda qalypty jaǧdai retınde qabyldanatyny belgılı boldy.
"Qaiǧyly oqiǧanyŋ sebepterı retınde "ülkender" tarapynan jüielı türde qorqytu, psihologiialyq qysym körsetu jäne eŋbekke mäjbürleu faktılerı anyqtaldy.
Atap aitqanda, qaiǧyly oqiǧaǧa deiıngı soŋǧy künderı kämeletke tolmaǧan jasöspırım jastar arasynda "avtoritet" retınde tanylǧan joǧaryda körsetılgen azamattyŋ üiınde mäjbürlı türde qūrylys jūmystaryn atqarǧan", - delıngen habarda.
Qūzyrly organ aqparatynşa, auyldyŋ 22 jastaǧy tūrǧyny, sondai-aq 10-11 synyptyŋ ekı oquşysy küdıktı retınde tanylǧan.
Jambyl oblysynyŋ kämeletke tolmaǧandardyŋ ısterı jönındegı mamandandyrylǧan audanaralyq sotynyŋ ükımımen olar kämeletke tolmaǧan balany özıne-özı qol saluǧa deiın jetkızgenı üşın kınälı dep tanylǧan.
"Negızgı oryndauşyǧa 8 jyl bas bostandyǧynan aiyru jazasy taǧaiyndalsa, al onyŋ kämeletke tolmaǧan ekı sybailasynyŋ ärqaisysyna 5 jyldan bas bostandyǧynan aiyru jazasy taǧaiyndaldy", - delıngen aqparatta.
Ükım zaŋdy küşıne engen joq.
