2 apta 2 künge sozylǧan nätijesız jiyn. COP31 konferensiiasy klimattyq kelısımsız aiaqtaldy

194
Adyrna.kz Telegram
https://adyrna.kz/storage/uploads/iCZUf2pUsO9QTUFY4umkXQKTPoFXvtTo9PIq9ocj.jpg

Foto: The Associated Press

Türkiianyŋ Antalia qalasynda ötken BŪŪ-nyŋ COP31 klimattyq konferensiiasy qatysuşy elder arasynda ortaq kelısımge kelmei aiaqtaldy. Europalyq odaq pen bırqatar memleket qazba otyndaryna qatysty naqty mındettemelerdıŋ bolmauyna bailanysty qorytyndy qūjatty qabyldaudan bas tartty. Būl turaly Euronews jazdy, dep habarlaidy "Adyrna".

Jeksenbı künı taŋerteŋ kelısımnıŋ jaŋa jobasy jariialanǧanymen, onda qazba otyndarynan bas tartu mäselesı qarastyrylmaǧan. Būl konferensiia barysynda negızgı dauǧa ainalyp, kelıssözderdıŋ ūzaqqa sozyluyna sebep boldy.

COP31 prezidentı ärı Türkiianyŋ ekologiia ministrı Mūrat Kurum qūjat boiynşa ortaq şeşımge kele almaǧandaryn mälımdedı.

«Būl mätın boiynşa ortaq kelısım joq ekenın tüsınemın. Sondyqtan atalǧan şeşımder qabyldanǧan joq», – dedı ol Antaliada ötken qorytyndy otyrysta.

Europalyq odaqqa töraǧalyq etetın İrlandiianyŋ klimat jäne energetika ministrı Darrag O’Braien de ūsynylǧan qūjatqa qarsylyq bıldırdı. Onyŋ aituynşa, EO klimattyŋ özgeruıne negızgı sebep bolyp otyrǧan qazba otyndary turaly bır auyz söz aitylmaǧan qorytyndy şeşımdı maqūldamaidy. Ministr Europalyq odaq pen oǧan müşe memleketter jobany qazırgı jaǧdaiǧa sai emes dep baǧalaǧanyn atap öttı.

Aita keteiık, konferensiianyŋ alǧaşqy jobasynda qazba otyndaryn paidalanudan jedel bas tartu ūsynylǧan bolatyn. Alaida beisenbı künı jariialanǧan ekınşı nūsqadan būl turaly barlyq eskertuler alynyp tastaldy. Osyǧan bailanysty Fransiia men Panamany qosa alǧanda, bırqatar memleket jūma künı kelısımde qazba otyndarynan bas tartuǧa baǧyttalǧan «naqty özgerıster» körsetıluın talap ettı.

BŪŪ Bas hatşysy Antoniu Guterriş kelıssözderdıŋ ortaq mämılesız aiaqtalǧanyna qatty köŋılı qalǧanyn jetkızdı. Ol klimattyq daǧdarys jaǧdaiynda memleketterden batyl şeşımder kütkenın atap öttı.

«Klimattyq daǧdarys talap etıp otyrǧan mındetterdıŋ maŋyzyn ükımet tüsınıp, soǧan sai äreket etedı dep kütken barşa adamnyŋ tereŋ ökınışıne ortaqpyn», – delıngen onyŋ mälımdemesınde.

Sonymen qatar BŪŪ Bas hatşysy qazba otyndaryna qatysty qataŋ ūstanymyn bıldırdı.

«Planetamyzdy joiu arqyly paida tauyp otyrǧandar ony qūtqaru jolyndaǧy kürestıŋ şarttaryn eşqaşan belgılemeuı kerek. Qazba otyndary klimattyq daǧdarysty uşyqtyryp otyr», – dedı Antoniu Guterriş.

Kelıssözderge jetekşılık etken Avstraliianyŋ klimat mäselelerı jönındegı ministrı Kris Bouen de sammit qorytyndysyna köŋılı tolmaitynyn aitty.

«Ökınışke qarai, qorytyndy qūjat boiynşa kelısımge kele almadyq. Būl, ärine, köŋıl könşıtpeidı. Öte ökınıştı», – dedı ol.

Nätijesınde, COP31 BŪŪ tarihyndaǧy eŋ ūzaq klimattyq konferensiialardyŋ bırıne ainalyp, josparlanǧan merzımnen ekı künge ūzaqqa sozyldy. Alaida ūzaqqa sozylǧan kelıssözderge qaramastan, qatysuşy memleketter klimattyq mäseleler boiynşa ortaq kelısımge kele almady. Jiyn 9 qaraşada bastaldy, 20 qaraşada aiaqtaluy kütılgenımen, taǧy da ekı künge sozylǧan.

Pıkırler