Mirziioev qūrylysqa otandyq materialdardy paidalanuǧa mındettedı

571
Adyrna.kz Telegram
https://adyrna.kz/storage/uploads/u2ytCW2Y28XOU1aaGbK2wTtwTQBLb73pJWKlD1Tu.webp

Foto: Özbekstan prezidentınıŋ baspasöz qyzmetı

Özbekstanda 2027 jyldan bastap memlekettık biudjet esebınen jüzege asyrylatyn qūrylys jobalarynda negızınen jergılıktı öndırısten şyqqan qūrylys materialdaryn paidalanu tärtıbı engızıledı. Būl turaly el prezidentı Şavkat Mirziioev Taşkent oblysynyŋ Parkent audanynda käsıpkerlermen kezdesude aity, dep habarlaidy “Adyrna”.

Memleket basşysynyŋ aituynşa, otandyq qūrylys materialdaryn öndıretın käsıporyndar üşın memlekettık satyp alu portalynda arnaiy sauda alaŋy aşylady. Sonymen qatar Jaŋa Taşkent qalasyndaǧy qūrylys saluşylarǧa jergılıktı önımderdı satyp alu maqsatynda 200 million dollar kölemınde nesie jelısı ūsynylady.

Qūrylys materialdarynyŋ sapasyn baqylau jäne halyqty qauıptı önımderden qorǧau üşın Taşkent, Ferǧana jäne Samarqand qalalarynda zamanaui synaq zerthanalary qūrylady. Būdan bölek, jobalau instituttarynyŋ jūmysyn qaita ūiymdastyru, salaǧa jaŋa tehnologiialardy engızu jäne jeke investorlardy tartu mındetı qoiyldy.

Prezidenttıŋ mälımetınşe, soŋǧy on jylda qūrylys materialdaryn öndıru salasyna 12 milliard dollar investisiia tartylyp, 5 myŋnan astam zauyt ıske qosylǧan. Biylǧy jyldyŋ qorytyndysy boiynşa öndırıs kölemı 65 trillion sumǧa (şamamen 5,5 milliard dollar), al eksport kölemı 1,5 milliard dollarǧa jetedı dep kütılude.

Şavkat Mirziioev aldaǧy jyldary qūrylys materialdary eksportynyŋ kölemın 5 milliard dollarǧa deiın arttyruǧa mümkındık bar ekenın atap öttı. Būl üşın qosylǧan qūny joǧary önım öndırısın ūlǧaitu, özbek käsıporyndaryn şetelde qoldau jäne logistikalyq mümkındıkterdı keŋeitu közdelıp otyr.

Sonymen bırge prezident qūrylys materialdarynyŋ sapasy men bäsekege qabılettılıgın arttyru qajettıgın aitty. Öitkenı keibır önım türlerınıŋ importy älı de joǧary deŋgeide qalyp otyr. Qazırgı taŋda onyŋ jyldyq kölemı 780 million dollardy qūraidy.

Memleket basşysy qūrylys jūmystarynyŋ özındık qūnyn tömendetu jäne biudjet qarajatyn tiımdı paidalanu mäselesıne de nazar audardy. Onyŋ aituynşa, ärtürlı öŋırlerde bırdei nysandardyŋ qūrylysyna jūmsalatyn qarajat kölemı aitarlyqtai erekşelenedı. Būǧan deldaldardyŋ köptıgı men jobalyq-smetalyq qūjattarǧa bırneşe ret özgerıs engızıluı sebep bolyp otyr.

Kezdesu barysynda turizm salasyn damytu mäselelerı de talqylandy. Prezidenttıŋ deregınşe, jyl basynan berı Özbekstanǧa 11,6 million şeteldık turist barǧan. Soŋǧy ekı jylda turisterdıŋ elde ortaşa bolu merzımı 6,5 künnen 8 künge deiın ūzarǧan. Al tölem qabıletı joǧary saiahatşylardyŋ ülesı 14 paiyzdan 21 paiyzǧa ösken. Bır turistıŋ ortaşa şyǧyny da 21 paiyzǧa artqan.

Osyǧan bailanysty endı turistık qyzmetterdıŋ sapasyn arttyruǧa basymdyq berılmek. Būl baǧytta käsıpkerlerge körsetıletın qoldau şaralary keŋeitılıp, qonaqüiler saluǧa qarjy bölınedı. Sondai-aq salaǧa arnalǧan salyqtyq jeŋıldıkter saqtalady.

Özbekstan aldaǧy uaqytta şeteldık turister sanyn 20 millionǧa jetkızudı, turizmnıŋ ekonomikadaǧy ülesın 7 paiyzǧa deiın arttyrudy jäne qyzmetter eksportyn 10 milliard dollarǧa jetkızudı josparlap otyr.

Būdan bölek, Şavkat Mirziioev 25–27 qaraşa künderı Taşkentte halyqaralyq turistık investisiialyq forum ötetının eske saldy. Jiynǧa 25-ten astam elden 100-den asa ırı investor qatysady dep kütılude. Prezident forum aiasynda naqty kelısımderge qol jetkızıp, olardy bolaşaqta investisiialyq jobalarǧa ainaldyru mındetın qoidy.

Pıkırler