Almaty oblysy, Ile aýdany, Boraldaı aýyly, Jaınaq yqsham aýdanynyń turǵyndary 2016 jyly salynǵan jańa mekteptiń jaramsyz bolyp qalǵanyn málimdedi, dep habarlaıdy “Adyrna” ulttyq portaly.
Atalǵan aýyldyń turǵyndary jýrnalısterden kómek qolyn sozýdy suraǵan.
Sebebi 2016 jyly qoldanysqa berilgen mektep, 2024 jyly aqpan aıyndaǵy jer dúmpýleriniń saldarynan irge tasy jarylyp, keregeleri aıyrylyp, oqý ǵımaraty jaramsyz bolyp qalǵan.
Mektep basshylary aqpan aıynda bolǵan jaıdy jasyryp, balalardy apatty mektepte ári qaraı oqyta berýdi jón sanapty. Biraq, sergek ata-analardyń janaıqaıymen bul másele jarııa bolyp, oqýshylar qashyqtan oqytýǵa jiberilgen. Iaǵnı mektep oqýshylardy 2023-2024 oqý jylynyń sońǵy eki toqsanyn qashyqtan oqytqan.
Aýyl halqy "2016 jyly ǵana qoldanysqa berilgen jańa mektep nege bulaı jaramsyz bolyp qaldy?" degen suraqqa jaýap ala almaı otyr.
Sońǵy ýaqytta memleket qarjysynana 1 mlrd teńge bólinip kúrdeli jóndeý jumystary júrgiziledi degen aqparat taraǵan. Dese de, búgingi kúni, ıaǵnı 2024 jyldyń shilde aıynyń 23 juldyzynda mektepti jóndeý jumystary áli bastalmapty.
Ata-analar "Mektep oqýshylary 2024-2025 oqý jylyn taǵy da qashyqtyqtan oqytylmaq pa?" dep alańdap otyr. Onyń syrtynda irgetasy ydyrap, apatty jaǵdaıda turǵan mekteptiń kúrdeli jóndeýden keıin de jer dúmpýlerine shydas bererine senbeıdi. Sondyqtan da, beısenbi kúni ata-analar jınalyp, narazylyq bildirmek.
