Jetısu oblysynyŋ oquşylary «Aibyn-2026» XII Halyqaralyq äskeri-patriottyq jastar jiynynda top jardy. Jetısulyq jas chempion sarbazdardy aituly jeŋısımen Qazaqstan Respublikasynyŋ Prezidentı Qasym-Jomart Kemelūly Toqaev arnaiy qūttyqtap, olardyŋ joǧary daiyndyǧy men jetıstıgıne zor baǧa berdı.
Atap ötsek, 21–27 mausym aralyǧynda Aqmola oblysynyŋ Şuchinsk qalasyndaǧy Ş. Uälihanov atyndaǧy Äskeri kolledjge qarasty «Amandyq» oqu poligonynda «Aibyn-2026» XII Halyqaralyq äskeri-patriottyq jastar jiyny ötken bolatyn. Atalǧan halyqaralyq ıs-şaraǧa 5 memleketten 53 komanda qatysyp, jas sarbazdar äskeri-patriottyq daiarlyq, äskeri-qoldanbaly sport türlerı jäne komandalyq jarystar boiynşa özara baq synasty.
Jetısu oblysynyŋ namysyn qorǧaǧan «Jetısu tarlandary» äskeri-patriottyq klubynyŋ 15 tärbielenuşısı joǧary daiyndyqtaryn, äskeri şeberlıkterın, ūiymşyldyǧy men patriottyq ruhyn tanytyp, barlyq kezeŋderdıŋ qorytyndysy boiynşa jüldelı I oryndy jeŋıp aldy.
Jetısulyq äskeri-patriottyq klubynyŋ müşesı, Taldyqorǧan qalasyndaǧy Q. Qasymov atyndaǧy №28 IT mektep-liseiınıŋ 10-synyp oquşysy Nūrasyl Şaripov būl jarystyŋ özıne erekşe äser qaldyrǧanyn aitady:
- «Jetısu tarlandary» klubyna müşe bolǧanyma 5 jyldai uaqyt boldy. Osy uaqyt aralyǧynda äskeri baǧyttaǧy tärbie men tärtıpten köp närse üirendım. «Aibyn» baiqauy öte tartymdy ärı qyzyqty öttı. Qarsylastarymyz da osal bolǧan joq, sondyqtan är kezeŋ tartysqa toly boldy. Osyndai Halyqaralyq deŋgeidegı dodaǧa qatysu bızge ülken täjıribe men motivasiia syilady. Jarysta komandamyzdyŋ bırlıgınıŋ, şeberlıgınıŋ arqasynda barlyq kezeŋnen sürınbei öttık. Elımızdıŋ Prezidentın jaqynnan körıp, qolyn qysu – men üşın ülken märtebe ärı ömır boiy ūmytylmaityn sät boldy, - deidı ol.
Jalpy, «Jetısu tarlandary» äskeri-patriottyq kluby 2015 jyly Taldyqorǧan qalasyndaǧy Uşinskii atyndaǧy №7 orta mekteptıŋ bazasynda qūrylǧan. Klub bügınge deiın «Aibyn» äskeri-patriottyq jastar jiynynda bırneşe ret top jarǧan. Atap aitsaq, 2017 jyly I oryndy, 2022 jyly Bas jüldenı ielendı, biyl üşınşı ret jeŋıske jetıp otyr.
