جەتىسۋ وبلىسىنىڭ وقۋشىلارى «ايبىن-2026» XII حالىقارالىق اسكەري-پاتريوتتىق جاستار جيىنىندا توپ جاردى. جەتىسۋلىق جاس چەمپيون ساربازداردى ايتۋلى جەڭىسىمەن قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ ارنايى قۇتتىقتاپ، ولاردىڭ جوعارى دايىندىعى مەن جەتىستىگىنە زور باعا بەردى.
اتاپ وتسەك، 21–27 ماۋسىم ارالىعىندا اقمولا وبلىسىنىڭ ششۋچينسك قالاسىنداعى ش. ءۋاليحانوۆ اتىنداعى اسكەري كوللەدجگە قاراستى «اماندىق» وقۋ پوليگونىندا «ايبىن-2026» XII حالىقارالىق اسكەري-پاتريوتتىق جاستار جيىنى وتكەن بولاتىن. اتالعان حالىقارالىق ءىس-شاراعا 5 مەملەكەتتەن 53 كوماندا قاتىسىپ، جاس ساربازدار اسكەري-پاتريوتتىق دايارلىق، اسكەري-قولدانبالى سپورت تۇرلەرى جانە كوماندالىق جارىستار بويىنشا ءوزارا باق سىناستى.
جەتىسۋ وبلىسىنىڭ نامىسىن قورعاعان «جەتىسۋ تارلاندارى» اسكەري-پاتريوتتىق كلۋبىنىڭ 15 تاربيەلەنۋشىسى جوعارى دايىندىقتارىن، اسكەري شەبەرلىكتەرىن، ۇيىمشىلدىعى مەن پاتريوتتىق رۋحىن تانىتىپ، بارلىق كەزەڭدەردىڭ قورىتىندىسى بويىنشا جۇلدەلى ءى ورىندى جەڭىپ الدى.
جەتىسۋلىق اسكەري-پاتريوتتىق كلۋبىنىڭ مۇشەسى، تالدىقورعان قالاسىنداعى ق. قاسىموۆ اتىنداعى №28 ءىت مەكتەپ-ليتسەيىنىڭ 10-سىنىپ وقۋشىسى نۇراسىل شاريپوۆ بۇل جارىستىڭ وزىنە ەرەكشە اسەر قالدىرعانىن ايتادى:
- «جەتىسۋ تارلاندارى» كلۋبىنا مۇشە بولعانىما 5 جىلداي ۋاقىت بولدى. وسى ۋاقىت ارالىعىندا اسكەري باعىتتاعى تاربيە مەن تارتىپتەن كوپ نارسە ۇيرەندىم. «ايبىن» بايقاۋى وتە تارتىمدى ءارى قىزىقتى ءوتتى. قارسىلاستارىمىز دا وسال بولعان جوق، سوندىقتان ءار كەزەڭ تارتىسقا تولى بولدى. وسىنداي حالىقارالىق دەڭگەيدەگى دوداعا قاتىسۋ بىزگە ۇلكەن تاجىريبە مەن موتيۆاتسيا سىيلادى. جارىستا كوماندامىزدىڭ بىرلىگىنىڭ، شەبەرلىگىنىڭ ارقاسىندا بارلىق كەزەڭنەن سۇرىنبەي وتتىك. ەلىمىزدىڭ پرەزيدەنتىن جاقىننان كورىپ، قولىن قىسۋ – مەن ءۇشىن ۇلكەن مارتەبە ءارى ءومىر بويى ۇمىتىلمايتىن ءسات بولدى، - دەيدى ول.
جالپى، «جەتىسۋ تارلاندارى» اسكەري-پاتريوتتىق كلۋبى 2015 جىلى تالدىقورعان قالاسىنداعى ۋشينسكي اتىنداعى №7 ورتا مەكتەپتىڭ بازاسىندا قۇرىلعان. كلۋب بۇگىنگە دەيىن «ايبىن» اسكەري-پاتريوتتىق جاستار جيىنىندا بىرنەشە رەت توپ جارعان. اتاپ ايتساق، 2017 جىلى ءى ورىندى، 2022 جىلى باس جۇلدەنى يەلەندى، بيىل ءۇشىنشى رەت جەڭىسكە جەتىپ وتىر.
