Resei «Sarmat» qūrlyqaralyq ballistikalyq zymyranyn synaqtan sättı ötkızdı. Būl turaly eldıŋ strategiialyq maqsattaǧy zymyran äskerlerınıŋ qolbasşysy Sergei Karakaevaitty, dep habarlaidy «Adyrna» tılşısı.
Ol prezident Vladimir Putin aldynda jasaǧan baiandamasynda «Sarmat» negızgı sipattamalary boiynşa özınıŋ aldyndaǧy «Voevoda» zymyran keşenınen asyp tüsetının mälımdedı. Atap aitqanda, ūşu qaşyqtyǧy, jük kötergıştıgı jäne zymyranǧa qarsy qorǧanys jüielerın eŋseru mümkındıgı joǧary.
Sondai-aq Karakaev «Sarmat» qūrlyqaralyq ballistikalyq zymyranyna arnalǧan ūşyru qondyrǧylary strategiialyq iadrolyq küşterdıŋ äleuetın edäuır arttyratynyn jetkızdı. Odan bölek, «Sarmat» keşenımen qarulanǧan alǧaşqy zymyran polkı 2026 jyldyŋ soŋyna deiın jauyngerlık kezekşılıkke qoiylatyny aityldy.
Äzırge batystyŋ täuelsız derekközderı reseilık zymyrannyŋ ūşyryluyna qatysty pıkır bıldırgen joq. Sondai-aq onyŋ ūşu traektoriiasy da belgısız küiınde qalyp otyr.
Aita keteiık, būl — jaŋa auyr ballistikalyq zymyrannyŋ ekınşı sättı synaǧy. Alǧaşqy ūşyrylym 2022 jyly ötken bolatyn. 2024 jyly Plesesk ǧaryş ailaǧy aumaǧynda zymyrandy ūşyru äreketı kezınde apat bolyp, ūşyru şahtasy qiraǧan edı.
Jariialanǧan sipattamalarǧa süiensek, «Sarmat» — älemdegı eŋ ırı qūrlyqaralyq ballistikalyq zymyrandardyŋ bırı. CSIS janyndaǧy Missilethreat jobasynyŋ baǧalauynşa, zymyrannyŋ paidaly jük salmaǧy 10 tonnaǧa jetedı.
