31 mamyr – Qazaqstandaǧy Saiasi quǧyn-sürgın jäne aşarşylyq qūrbandaryn eske alu künıne orai Europalyq Odaqtyŋ Qazaqstandaǧy Elşısı Aleşka Simkich pen EO-ǧa müşe memleketterdıŋ elşılerı Qaraǧandy oblysyndaǧy Spassk memorialdyq keşenınde ötken gül qoiu räsımıne qatysty.
Is-şaraǧa Qaraǧandy oblysynyŋ resmi ökılderı de qatysyp, totalitarlyq rejimderdıŋ qūrbandaryn eske aldy. Räsım barysynda saiasi quǧyn-sürgınge ūşyrap, jazyqsyz sottalǧan, habar-oşarsyz ketken azamattardyŋ, sondai-aq aşarşylyq jyldarynda qaza tapqan milliondaǧan adamnyŋ ruhyna taǧzym etıldı.
Aita ketsek, Spassk memorialdyq keşenı – HH ǧasyrdaǧy saiasi quǧyn-sürgın qūrbandarynyŋ taǧdyryn eske salatyn maŋyzdy tarihi oryndardyŋ bırı. Būl jerde ärtürlı ūlt ökılderı bolǧan tūtqyndar men totalitarlyq jüienıŋ zardabyn tartqan jandarǧa arnalǧan eskertkışter ornalasqan.
Qazaqstanda jyl saiyn 31 mamyrda saiasi quǧyn-sürgın men aşarşylyq qūrbandary eske alynyp, el tarihyndaǧy qasırettı kezeŋderden zardap şekken jandardyŋ ruhyna taǧzym etıledı.
