Foto: Michaela Stache/AFP/Getty Images
Senbı, 14 aqpanda Miunhen qalasynda İran bilıgıne qarsy auqymdy narazylyq aksiiasy öttı. Polisiianyŋ mälımetınşe, şeruge şamamen 200 myŋ adam qatysqan. Būl körsetkış ūiymdastyruşylar kütken sannan äldeqaida joǧary bolǧan, dep habarlaidy “Adyrna” portaly Dw.com saityna sıltep.
Aksiia Miunhen qauıpsızdık konferensiiasy (MSC) ötıp jatqan künderı ūiymdastyryldy. Konferensiiaǧa qatysu üşın Germaniiaǧa kelgen irandyq oppozisioner, 1979 jyly taqtan taidyrylǧan şahtyŋ ūly Reza Pehlevi de mitingke arnaiy baryp, jinalǧandardyŋ aldynda söz söiledı.
Narazylyq bıldıruşıler jaŋbyrǧa qaramastan qalanyŋ ortalyǧyndaǧy Terezienvize alaŋyna jinaldy. Pehlevi sahnaǧa şyqqanda, keibır qatysuşylar onyŋ portretterın ūstap, «Şah jasasyn!» dep ūrandatty. Şerudı oppozisiialyq The Munich Circle toby ūiymdastyrǧan.
Miting barysynda söz alǧandar İranda beibıt ärı demokratiialyq bilık auysuy qajet ekenın aitty. Qatysuşylar Tegerandaǧy qazırgı basşylyq öz halqyna qarsy jasalǧan zorlyq-zombylyq pen quǧyn-sürgın üşın jauap beruı tiıs ekenın atap öttı. Däl osy künı İran bilıgıne qarsy narazylyq aksiialary älemnıŋ özge de ırı qalalarynda, sonyŋ ışınde Toronto men Los-Andjeleste öttı.
Pehlevi Trampqa ündeu jasady
Miting aldynda Reza Pehlevi İrandaǧy saiasi jüienı özgertu uaqyty kelgenın mälımdedı. Onyŋ aituynşa, el ışındegı soŋǧy narazylyqtarǧa qatysqandar qoldanystaǧy instituttardy reformalaudy emes, qazırgı rejimdı tolyq auystyru üşın halyqaralyq qoldau sūraǧan.
Pehlevi AQŞ prezidentı Donald Trampqa ündeu jasap, irandyqtar onyŋ «kömek jolda» degen mälımdemelerın estıgenın jetkızdı. Ol AQŞ tarapynan naqty qoldau bolady dep ümıt bıldırıp, köptegen irandyqtar amerikalyq köşbasşyǧa senım artatynyn aitty.
Oppozisiia ışındegı alauyzdyq
Soŋǧy jyldary İrandaǧy narazylyqtar barysynda keibır toptar monarhiiany qalpyna keltırudı qoldaǧan. Alaida Reza Pehlevi özınıŋ taqqa qaita oraludy közdemeitının atap öttı. Ol basty maqsaty – iran halqynyŋ öz bilıgın erkın taŋdauyna mümkındık beru ekenın aitty.
Sonymen qatar, irandyq oppozisiia älı de bırtūtas küşke ainala almai otyr. Pehlevi İzraildı qoldaǧany üşın jäne äkesı – soŋǧy şah Mohammed Reza Pehlevidıŋ avtoritarlyq basqaru stilınen aşyq türde alşaqtamaǧany üşın synǧa ūşyrauda. Sarapşylardyŋ pıkırınşe, oppozisiianyŋ bytyraŋqylyǧy İrandaǧy saiasi özgerıster üderısıne äser etuı mümkın.
