İslamabadta AQŞ pen İran arasyndaǧy kelıssözder qarsaŋynda diplomatiialyq ahual bırşama jūmsarǧany baiqalady.
AQŞ Qatardaǧy jäne basqa da şeteldık bankterde būǧattalǧan irandyq aktivterdı bosatuǧa daiyn ekenı jönınde belgı bergen. Reuters agenttıgınıŋ mälımetınşe, būl aqparatty joǧary lauazymdy irandyq derekköz rastaǧan.
Tegeran būl qadamdy Vaşingtonnyŋ aldaǧy kelıssözderge baiyppen qaraitynynyŋ belgısı retınde baǧalap otyr. Kelıssözder İslamabad qalasynda ötıp, negızgı taqyryptardyŋ bırı Ormuz būǧazy arqyly qauıpsız navigasiiany qamtamasyz etu mäselesı bolmaq.
Degenmen, AQŞ tarapynan aktivterdı bosatu turaly resmi mälımdeme jasalǧan joq. Ekınşı irandyq derekközdıŋ aituynşa, söz bolyp otyrǧan qarajat kölemı şamamen 6 milliard dollardy qūraidy. Būl qarajat 2023 jyly Doha qalasynyŋ deldaldyǧymen jüzege asqan tūtqyndar almasu kelısımı aiasynda Qatar bankterıne audarylǧan.
Atalǧan qarjy bastapqyda İrannyŋ Oŋtüstık Koreia elıne mūnai satudan tüsken. Alaida 2018 jyly Donald Tramp äkımşılıgı sanksiialardy qaita engızgennen keiın būǧattalǧan bolatyn. Keiınırek, 2023 jyly AQŞ būl qarajatty tek gumanitarlyq maqsattarǧa — azyq-tülık, därı-därmek jäne medisinalyq qūral-jabdyqtar satyp aluǧa paidalanuǧa ışınara rūqsat bergen.
Bıraq 2023 jylǧy 7 qazandaǧy HAMAS ūiymynyŋ İzrailge jasaǧan şabuylynan keiın Vaşington būl qarajatqa qoljetımdılıktı qaita şektedı.
Soŋǧy künderı İrannyŋ IRGC qūrylymymen bailanysty aqparat közderı AQŞ aktivterdı bosatuǧa rūqsat berdı dep habarlaǧanymen, amerikalyq şeneunıkter būl mälımettı joqqa şyǧardy. CBS News telearnasyna bergen tüsınıktemede AQŞ mūndai şeşım qabyldamaǧanyn mälımdedı.
Aita keteiık, aimaqtaǧy şielenıstı diplomatiialyq jolmen şeşuge baǧyttalǧan äreketter jalǧasuda. Donald Tramp İranǧa qarsy soqqylardy uaqytşa toqtatuǧa daiyn ekenın bıldırgennen keiın, resmi Tegeran ekı aptalyq bıtım şarttaryn qabyldaǧan. Osyǧan bailanysty taraptar arasynda atysty toqtatu jönındegı kelıssözder İslamabadta ötpek.
