شىمكەنت قالاسىندا 4-5 قاڭتار كۇندەرى جاپپاي بۇزاقىلىق جانە لاڭكەستىك وقيعالار ورىن الدى. شامامەن 5 مىڭنان استام ادام قالا اكىمدىگىنىڭ عيماراتىنا شابۋىل جاسادى. مەملەكەتتىك قىزمەتشىلەرگە پوليتسيا قىزمەتكەرلەرى مەن اسكەريلەرگە قارسى كۇش قولدانىپ، جابىرلەۋدىڭ كوپتەگەن فاكتىلەرى ورىن الدى. جالپى، 50-دەن استام اسكەريلەر مەن قۇقىق قورعاۋ قىزمەتكەرلەرى ءارتۇرلى دارەجەدە جاراقات العان.
سودىرلار «تۇركىستان» سالتانات سارايىنا، كورمە ورتالىعىنا، ج.شانين اتىنداعى اكادەميالىق دراما تەاترىنا، «Nur Otan» پارتياسىنىڭ كەڭسەسىنە جانە وزگە دە عيماراتتارعا شابۋىل جاساپ، ءارتۇرلى دەڭگەيدە زيان كەلتىرىلگەن. جاپپاي تارتىپسىزدىك كەزىندە 59 اۆتوكولىك پەن 3 اۆتوبۋس قيراتىلىپ، كەيبىرى ورتەپ جىبەرىلگەن. انتيتەررورلىق وپەراتسيا بارىسىندا 400-گە جۋىق كۇدىكتى ازامات ۇستالىپ، ولاردىڭ 150-ىنە قاتىستى اكىمشىلىك ءىس قوزعالعان. ال، لاڭكەستىك توپتى ۇيىمداستىرۋشىلار رەتىندە كۇدىككە ىلىنگەن 50 ازاماتقا قاتىستى قىلمىستىق ءىس قوزعالىپ، سوتقا دەيىنگى تەرگەۋ جۇمىستارى جۇرگىزىلۋدە.
بۇگىندە شىمكەنتتە كونستيتۋتسيالىق زاڭدىلىق قالپىنا كەلتىرىلىپ، جاعداي تۇراقتاندىرىلدى. قالا اكىمى مۇرات ايتەنوۆتىڭ جەتەكشىلىگىمەن قۇرامىنا بارلىق قۇقىق قورعاۋ جانە مەملەكەتتىك ورگانداردىڭ باسشىلارى ەنگەن جەدەل شتاب جۇمىس ىستەپ جاتىر. اتالعان شتابتىڭ دەر كەزىندە قابىلداعان شەشىمدەرىنىڭ ارقاسىندا شىمكەنتتە لاڭكەستەردىڭ ستراتەگيالىق نىسانداردىڭ ەشقايسىسىن باسىپ الۋىنا جول بەرىلمەدى.
لاڭكەستىك ءىس-ارەكەتتەردەن ەڭ قاتتى زاقىمدانعان نىسانداردىڭ ءبىرى – شىمكەنتتەگى اكىمشىلىك-ىسكەرلىك ورتالىقتا ورنالاسقان كورمە ورتالىعى. عيمارات تولىعىمەن وتقا ورانعان. جاپپاي تارتىپسىزدىك توقتاتىلىپ، جاعداي تۇراقتانعان سوڭ ونەر ۇجىمدارى كورمە ورتالىعىن كۇل-قوقىستان تازارتىپ جاتىر. تازالاۋ جۇمىستارى «تۇركىستان» سالتانات سارايى مەن ج.شانين اتىنداعى اكادەميالىق دراما تەاترىندا دا جۇرگىزىلىپ جاتىر.
قالا اكىمىنىڭ تاپسىرماسىمەن قۇرالعان ارنايى كوميسسيا مادەنيەت نىساندارىنا كەلتىرىلگەن شىعىننىڭ كولەمىن انىقتاپ، ۇكىمەتتىڭ قاراۋىنا ۇسىنادى.
سودىرلار ستراتەگيالىق ماڭىزى بار مەملەكەتتىك نىساندار جانە مادەنيەت مەكمەلەرىمەن قاتار، كاسىپكەرلىك نىساندارىنا دا شابۋىل جاساعان. الىن الا ەسەپتەۋلەر بويىنشا، 10 بيزنەس سۋبەكتىسىنە زالال كەلتىرىلگەن. ولاردىڭ اراسىندا ساۋدا، كەڭسەلەر، ازىق-تۇلىك نىساندارى مەن لومباردتار بار. بۇزاقىلار كاسىپكەرلىك نىساندارىن قيراتىپ، تاۋارلار مەن بانكوماتتاردى توناعان، جيھاز بەن ارنايى قۇرالداردى بۇلدىرگەن، كەيبىرىن ورتەپ جىبەرگەن.
بۇل نىساندار نەگىزىنەن لاڭكەستىك ارەكەتتەر ورىن العان «ءنۇرسات» شاعىن اۋدانىندا جانە د.قوناەۆ داڭعىلى مەن ا.بايتۇرسىنۇلى، ۇ.ارعىنبەكوۆ كوشەلەرىنىڭ بويىندا ورنالاسقان.
شىمكەنت قالاسىنىڭ اكىمى بارلىق زارداپ شەككەن نىسانداردى ارالاپ، جاعدايمەن تانىسىپ شىقتى. شاھار باسشىسىنىڭ تاپسىرماسىنا سايكەس، قالا اكىمدىگى مەن «اتامەكەن» ۇلتتىق كاسىپكەرلەر پالاتاسىنىڭ بىرلەسكەن كوميسسياسى قۇرىلۋدا. اتالعان كوميسسيا بيزنەس سۋبەكتىلەرگە كەلتىرىلگەن ماتەريالدىق شىعىن كولەمىن انىقتايدى. مەملەكەت كاسىپكەرلەردىڭ بارلىق شىعىندارىن وتەپ، بۇلىنگەن نىسانداردى قالپىنا كەلتىرۋگە كومەكتەسەدى.
شىمكەنت قالاسىنىڭ بيزنەس قاۋىمداستىعى لاڭكەستەر مەن بۇزاقىلاردىڭ ارەكەتتەرىن قاتاڭ ايىپتايدى. كاسىپكەرلەر زاڭدىلىقتى، قوعامدىق ءتارتىپ پەن تۇراقتىلىقتى ساقتاۋعا شاقىرۋ ماقساتىندا «بىرلىك ءۇشىن» اتتى چەللەندج ۇيىمداستىرۋدا. سونداي-اق، بيزنەس قاۋىمداستىق وكىلدەرى قۇقىق قورعاۋ ورگاندارىنا كومەكتەسۋ ماقساتىندا قۇرىلعان «حالىق ساقشىلارى» اتتى ەرىكتىلەر جاساقتارىنىڭ قۇرامىنا قوسىلىپ، ولارعا جان-جاقتى قولداۋ كورسەتۋدە.
