وركەنيەتتى قوعامدا كەز-كەلگەن تۇيىتكىلدىڭ ءتۇيىنى ديالوگ ارقىلى شەشىلەدى. بەيبىت شەرۋ رەتىندە باستالىپ، سوڭى تارتىپسىزدىككە ۇلاسقان وقيعا شىمكەنت قالاسى تۇرعىندارىنىڭ دا دەگبىرىن قاشىرىپ، ءبىراز ابىگەرگە سالدى.
سودىرلار ماقساتتى تۇردە قالا اكىمدىگىن باسىپ الۋدى كوزدەگەن. اكىمشىلىك ىسكەرلىك ورتالىقتا ورنالاسقان «تۇركىستان» سارايى، «كورمە» ورتالىعى مەن ج.شانين اتىنداعى اكادەميالىق دراما تەاترىنىڭ عيماراتىنا ءتۇرلى دەڭگەيدە زيان كەلتىرىلگەن. وسى ماڭدا تۇراتىن قالا تۇرعىندارى جارىلىس، ايقاي-شۋدىڭ داۋىسىنان الاڭداۋمەن بولعانىن ايتادى.
– كەشەگى بەيبىت شەرۋ بولىپ باستالعان ەل قوزعالىسىنىڭ سوڭى بۇزاقىلىققا ۇلاستى. قاراپايىم، ەلىن سۇيەتىن حالىق مۇنداي تارتىپسىزدىككە بارماس ەدى. اكىمشىلىك ىسكەرلىك ورتالىقتاعى عيماراتتاردان بولەك، كوپتەگەن شاعىن كاسىپكەرلىكتەرگە، دۇكەندەرگە شابۋىل جاسالعان. توناعان، قالعانىن قيراتىپ كەتكەن. مۇنىڭ بارلىعى بۇزاقى توپتىڭ ماقساتتى تۇردە ۇيىمداستىرعان ارەكەتى بولۋى مۇمكىن. زامانداستارىمىزدى ارانداپ قالماۋعا شاقىرامىن، - دەيدى شىمكەنتتىك قايرات ءاشىروۆ.
ال، سول ماڭدا تۇراتىن سابىر الكەەۆ جارىلعىش زاتتاردىڭ داۋىسى مەن حالىقتىڭ ايعاي-شۋى تۇرعىنداردىڭ ۇرەيىن ۇشىرعانىن ايتادى.
— 4-6 قاڭتار ارالىعىنداعى جاعداي وتە كۇردەلى بولدى. عيماراتتاردىڭ ورتەنگەنىن، جاراقاتتانعان ادامداردىڭ جانۇشىرا ايعايلاعان داۋىستارىن ەستىدىك. ەلىمىزدەگى ءاربىر پروبلەما بەيبىت تۇردە شەشىلسە، مۇنداي وقيعالار قايتالانباسا ەكەن دەيمىن. سەبەبى، حالىقتىڭ بەيبىت شەرۋىن لاڭكەستەر ءوز يگىلىگىنە پايدالانىپ كەتتى. حالىق تا، مەملەكەت تە زارداپ شەكتى. لايىم ەلىمىز تىنىش، جۇرتىمىز امان بولسا ەكەن، - دەيدى ول.
