Órkenıetti qoǵamda kez-kelgen túıitkildiń túıini dıalog arqyly sheshiledi. Beıbit sherý retinde bastalyp, sońy tártipsizdikke ulasqan oqıǵa Shymkent qalasy turǵyndarynyń da degbirin qashyryp, biraz ábigerge saldy.
Sodyrlar maqsatty túrde qala ákimdigin basyp alýdy kózdegen. Ákimshilik iskerlik ortalyqta ornalasqan «Túrkistan» saraıy, «Kórme» ortalyǵy men J.Shanın atyndaǵy akademııalyq drama teatrynyń ǵımaratyna túrli deńgeıde zııan keltirilgen. Osy mańda turatyn qala turǵyndary jarylys, aıqaı-shýdyń daýysynan alańdaýmen bolǵanyn aıtady.
– Keshegi beıbit sherý bolyp bastalǵan el qozǵalysynyń sońy buzaqylyqqa ulasty. Qarapaıym, elin súıetin halyq mundaı tártipsizdikke barmas edi. Ákimshilik iskerlik ortalyqtaǵy ǵımarattardan bólek, kóptegen shaǵyn kásipkerlikterge, dúkenderge shabýyl jasalǵan. Tonaǵan, qalǵanyn qıratyp ketken. Munyń barlyǵy buzaqy toptyń maqsatty túrde uıymdastyrǵan áreketi bolýy múmkin. Zamandastarymyzdy arandap qalmaýǵa shaqyramyn, - deıdi shymkenttik Qaırat Áshirov.
Al, sol mańda turatyn Sabyr Álkeev jarylǵysh zattardyń daýysy men halyqtyń aıǵaı-shýy turǵyndardyń úreıin ushyrǵanyn aıtady.
— 4-6 qańtar aralyǵyndaǵy jaǵdaı óte kúrdeli boldy. Ǵımarattardyń órtengenin, jaraqattanǵan adamdardyń janushyra aıǵaılaǵan daýystaryn estidik. Elimizdegi árbir problema beıbit túrde sheshilse, mundaı oqıǵalar qaıtalanbasa eken deımin. Sebebi, halyqtyń beıbit sherýin lańkester óz ıgiligine paıdalanyp ketti. Halyq ta, memleket te zardap shekti. Laıym elimiz tynysh, jurtymyz aman bolsa eken, - deıdi ol.
