ساعىنتاەۆتىڭ كورتەجىنە جاسالعان شابۋىل: "الماتى" ديرەكتورى وقيعانى باياندادى

1230

6 قاڭتاردا الماتى اكىمى باقىتجان ساعىنتاەۆتىڭ كورتەجىنە شابۋىل جاسالدى. وقيعانىڭ ءمان-جايىن "الماتى" تەلەارناسىنىڭ باس ديرەكتورى نۇرجان جالاۋقىزى ايتىپ بەردى. شابۋىل كەزىندە تەلەارنا قىزەتكەرلەرىنىڭ ءبىرى قازا بولدى، - دەپ حابارلايدى "ادىرنا" پورتالى Tengrinews.kz-كە سىلتەمە جاساپ.

"جۇرگىزۋشىمىز مۇراتحان بازارباەۆ قىزمەتتىك مىندەتىن اتقارۋ كەزىندە قازا بولدى. ارنايى تەحنيكا وپەراتورى دياسكەن بايتيباەۆ جارالاندى. ونىڭ وڭ قولىنا وق تيگەن، ەكى ساۋساعىنان ايىرىلدى. ءۇشىنشى قىزمەتكەر - وپەراتور ارسەن ساندىباەۆ امان-ەسەن", - دەدى نۇرجان جالاۋقىزى.

قازا بولعان جۇرگىزۋشىنىڭ اياعى مەن ىشىنە وق تيگەن.

"قازىر دياسكەن اۋرۋحانادا، وعان بارىنشا قولداۋ كورسەتىپ جاتىرمىز. ولاردىڭ وتباسىنا قاجەتتى كومەك كورسەتىلەدى. بۇل ءتىپتى تالقىلانبايدى دا", - دەدى جالاۋقىزى.

"الماتى" تەلەارناسىنىڭ ديرەكتورى ءتۇسىرىلىم توبىنا قالاي شابۋىل جاسالعانىن ايتىپ بەردى.

"ولار 6 قاڭتاردا، كەشكە رەسپۋبليكا الاڭىنا شىقتى. اسكەر الاڭدى باقىلاۋعا العانى ايتىلدى. مۇراتحان اعا كەڭسەگە جاقىن ماڭدا تۇراتىن، ءبارى سول كىسىنىڭ كولىگىنە وتىرىپ شىققان. ءال-فارابي داڭعىلىنان فۋرمانوۆقا (نازارباەۆ - ەسك.) بۇرىلعاندا ولارعا وق جاۋدىرعان", - دەدى جالاۋقىزى.

ول ءتۇسىرىلىم توبى قالا اكىمى باقىتجان ساعىنتاەۆتىڭ كورتەجى قۇرامىندا بولعانىن راستادى.

"ارىپتەسىمىز مۇراتحان بازارباەۆتىڭ وتباسىنا جانە جاقىندارىنا قايعىرا كوڭىل ايتامىز. ونىڭ باتىلدىعى، جۇمىسىنا بەرىلگەندىگى جانە قىزمەتى ماڭگى جادىمىزدا", - دەدى نۇرجان جالاۋقىزى.

بۇعان دەيىن الماتى اكىمى باقىتجان ساعىنتاەۆقا شابۋىل جاسالعانى حابارلانعان بولاتىن.

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket