بەكبولات قارجان: التىنتوبەدە جەر ءۇشىن كۇرەسكەن ازاماتتار سوتتالىپ جاتىر

3129
Adyrna.kz Telegram

ءبىرىنشى ءبولىم!

اعايىندى ەلدەردى قىرقىستىرىپ، جەرىن الىپ وتىرعاندار – اكىمشىلىكتەگىلەر جانە ولارمەن اۋىز جالاسقان جەرگىلىكتى لوببيستتەر

قر تۇڭعىش پرەزيدەنتى، ەلباسى - نۇرسۇلتان نازارباەۆقا;
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا;
قر پرەزيدەنتى اكىمشىلىگىنىڭ باسشىسى ەرلان قوشانوۆقا;
قر پارلامەنتى ءماجىلىسىنىڭ سپيكەرى نۇرلان نىعماتۋللينگە;
قر ىشكى ىستەر ءمينيسترى ەرلان تۇرعىمباەۆقا;
قر باس پروكۋرورى جاقىپ اسانوۆقا;
قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى مارات احمەتجانوۆقا;
قر مەملەكەتتىك قىزمەت ىستەرى اگەنتتىگىنىڭ ءتورايىمى جانار جايىلعانوۆاعا
التىنتوبە اۋىلى وكرۋگىنىڭ تۇرعىندارىنىڭ اتىنان

قۇرمەتتى، قازاقستان حالقى مەن قازاقستاننىڭ جوعارى بيلىگىندەگى لاۋازىمدى تۇلعالار! ءبىز جاقتاعى داۋعا نازار سالىڭىزدار!

مەن سىزدەرگە تۇركىستان وبلىسى، قازىعۇرت اۋدانى، ءوزىمنىڭ تۋعان اۋىلىم، تۋعان ولكەم - التىنتوبە اۋىلى وكرۋگىندە ورىن الىپ جاتقان تاۋەلسىزدىكتىڭ العاشقى جىلدارىنىڭ ىشىندە شەشىمىن تاپپاعان جەر داۋىنان ابدەن شارشاپ، اق پەن قارانى ايىرا الماي، ءتوزىمى شەگىنە جەتكەن جەرگىلىكتى حالىقتىڭ كۇيزەلىسى مەن جان-ايقايىن جەتكىزەمىن. اشۋ-ىزاعا بۋلىققان حالىقتىڭ جان-ايقايى وسى ۋاقىتقا دەيىن باق-تارعا، الەۋمەتتىك جەلىلەر مەن ۇلتتىق اقپاراتتىق پورتالدارعا شىقپادى. سەبەبى، ءبىزدىڭ قولىمىزدا جەر داۋىنا قاتىستى ماتەريالدار قورى جەتكىلىكسىز بولدى. جەرگىلىكتى اۋىلدىق جەرلەردە ءوز جەرلەرىن يگەرەمىن، ءوز كاسىبىمدى دوڭگەلەتەمىن دەگەن ازاماتتارعا قر كونستيتۋتسيالىق زاڭدارى مەن قر 2003 جىلعى «جەر كودەكسىنىڭ» 103 بابىنا سايكەس دالەلدەۋدى قاجەت ەتپەيتىن ءمان جايلار دەپ تابىلاتىن شارتتى جەر ۇلەسى بەرىلمەي، جەرگىلىكتى اتقارۋشى بيلىك تارماقتارى - اۋدان اكىمشىلىگىنىڭ، وبلىس اكىمشىلىگىنىڭ، ەڭ سوڭىندا قر اۋىلشارۋاشىلىعى مينيسترلىگىنەن باستاپ ءار-تاراپتار جەردى ءبىر بىرىنە سىلتەپ، وتكىزىپ جىبەرگەن قاۋلىلارى مەن شەشىمدەرى، قۇجاتتارىمەن تانىستىرا كەلە، جەرگىلىكتى مەملەكەتتىك اتقارۋشى ورگانداردىڭ حالىق 30 جىل بويى تالاپ ەتسە دە، ءارتۇرلى قۇيتىرقىلىقتارعا سالىپ، التىنتوبە اۋىلى وكرۋگىندە ەرتەدەن اتا-باباسى قونىستانعان حالىقتىڭ مۇددەسىنە ءوز تۇرعىلىقتى جەرىن وسى ۋاقىتقا دەيىن شەشىپ بەرۋگە جاراماي وتىر. ءبىزدىڭ قولىمىزدا جەرگىلىكتى مەملەكەتتىك اتقارۋشى ورگانداردىڭ حاتتارى مەن قاۋلىلارى، بىزگە جاۋاپ بەرگەن قۇجاتتارى بار. ونىڭ ەسەسىنە، جەرگىلىكتى مەملەكەتتىك اتقارۋشى ورگاندارمەن اۋىز جالاسقان لوببيستتەر مەن لاتيفۋنديستتەردىڭ حالىقتىڭ جەرىن ءار تۇسىنان جۇلما-جۇلماسىن شىعارىپ پايدالانىپ، مەملەكەتتىك اكت جاساپ الىپ، مەنشىكتەپ وتىرعانى قاسيەتتى جەردىڭ يەسى – جەرگىلىكتى تۇرعىنداردىڭ اشۋ-ىزاسىن اي وتكەن سايىن ەمەس، كۇن وتكەن سايىن اسقىندىرىپ بارادى. مۇنىڭ سوڭى جاقسىلىقپەن اياقتالمايتىنىن جەرگىلىكتى اتقارۋ ورگاندارى ەسكەرەر ەمەس. ەڭ ءبىر سوراقىسى – جەرگىلىكتى ورگاندارمەن اۋىز جالاسقان لوببيستتەرگە حالىقتىڭ رۇقساتىنسىز جەر ۋچاسكەلەرىنە مەملەكەكتتىك اكت جاساپ الۋىنا جول بەرىلسە، حالىقتىڭ مۇددەسىنە كەلگەندە ەشقانداي جەر دە، مۇلىك تە بۇيىرماي تۇرعانى ەلدى اشىندىرىپ وتىر. بۇل بۇگىن عانا ەمەس، تاۋەلسىزدىك العان 30 جىل بويى جالعاسىپ كەلە جاتىر. مۇنىڭ سوڭى اۋىل تۇرعىندارىنىڭ اراسىنداعى توبەلەس پەن داۋ-دامايلارعا، ءبىر ءبىرىنىڭ جاعىن ۇرىپ سىندىرىپ، ءبىر بىرىنە قول جۇمساۋىنا الىپ كەلۋدە. قازىرگى كۇنى التىنتوبە اۋىلى وكرۋگىندەگى ازاماتتارى ءبىر ءبىرىن جاۋ كورەتىن جاعدايدا وتىر.

كەزىندە كەڭەس وداعى ىدىراپ، قازاقستاننىڭ بارلىق وڭىرلەرىندەگى، اۋداندارىنداعى اۋىل وكرۋگتەرىندەگى سوۆحوزدار ەن كولحوزدار، شارۋاشىلىقتار تاراپ، جەرگىلىكتى حالىققا وزدەرىنە تيەسىلى شارتتى جەر ۇلەستەرى بەرىلىپ جاتتى. بىراق نەگە ەكەنى بەلگىسىز، التىنتوبە شارۋاشىلىعى تاراتىلماي، حالىققا ءوزىنىڭ جەرىنىڭ قۇجاتتارى مەن جەردىڭ كوك قاعازى بەرىلمەي، شارۋاشىلىق بۇرىنعى كەڭەس ۇكىمەتى كەزىندەگى كەڭشار سياقتى قالپىندا قالدى. سوڭىندا التىنتوبە شارۋاشىلىعىنىڭ جەر تەلىمدەرى تۇقىم ءوندىرۋشى شارۋاشىلىق رەتىندە قازاقستان رەسپۋبليكاسىنىڭ اۋىلشارۋاشىلىعى مينيسترلىگىنىڭ «رەسپۋبليكالىق مەملەكەتتىك قازىنالىق كاسىپورىنى» (رمقك) رەتىندە ساقتالدى. جەر تەلىمدەرى قر اۋىلشارۋاشىلىق مينيسترلىگىندە قانداي ماقساتتا ساقتالعانى دا بەلگىسىز. راسىندا ەليتالى تۇقىم ءوندىرۋشى شارۋاشىلىق رەتىندا ساقتالىپ، رەسپۋبليكاعا پايداسى تيگەنى جونىندە مالىمەتتەر دە جوق.

نەگىزىنەن، التىنتوبە شارۋاشىلىعىنىڭ جەر تەلىمدەرى جەرگىلىكتى تۇرعىندارعا قر «جەر كودەكسىنىڭ» 103-بابىنا سايكەس تاراتىلۋعا ءتيىس بولاتىن. بىراق بۇل شارۋاشىلىقتى تاراتۋ جەرگىلىكتى مەملەكەتتىك ورگانداردىڭ تاراپىنان ىسكە اسپاي، حالىققا شارۋاشىلىقتىڭ جەرلەرى زاڭ اياسىندا بەرىلمەي، اكىمشىلىكتى باسقارعان باسشىلار مەن جەرگىلىكتى لوببيستتەردىڭ تىرناعىندا كەتتى. سودان بەرى التىنتوبەدە قونىستانعان جۇرلشىلىقتىڭ بەرەكەسى ۇشتى، قۇقى تاپتالدى، مۇددەسى ۇرلاندى، الەۋمەتتىك احۋالى باسقا اۋىلدىق وكرۋگتەرىمەن سالىستىرعاندا 15-20 جىلعا ارتتا قالدى. نەگە دەيسىز؟ سەبەبى جالعىز. ءحالىوتىڭ وزىنە ءتيىسىلى جەرى جوق. جەرى جوق حالىقتىڭ قولىندا ەشتەڭە دە بولمايدى.

بۇرىنعى كەڭەس ۇكىمەتى كەزىندەگى التىنتوبە شارۋاشىلىعىنىڭ جەر تەلىمدەرى دە قازاقستان رەسپۋبليكاسىنىڭ «ۇكiمەتi بەلگiلەگەن تارتiپپەن» مەملەكەتتiك مەكەمەلەرگە بەكiتىلىپ بەرىلگەن وزگە دە مەملەكەتتiك مۇلiك جەكەشەلەندiرۋ وبەكتىلەرi العاشقى جەكەشەلەندىرۋ (پريۆاتيزاتسيا) جىلدارى «جەكەشەلەندىرۋ تۋرالى» قازاقستان رەسپۋبليكاسىنىڭ 1995 جىلعى 23 جەلتوقسانداعى N 2721 زاڭى نەگىزىندە تاراتىلىپ بەرىلۋى ءتيىس بولاتىن. بىراق جەرگىلىكتى مەملەكەتتىك اتقارۋشى ورگاندار بۇل پروتسەستى جەكەشەلەندىرۋ زاڭى نەگىزىندە جۇزەگە اسىرمادى. قر ۇكىمەتى مەن باس پروكۋراتۋرا دا ءبىزدىڭ وكرۋگتىڭ مۇلكى مەن جەرلەرىنىڭ تاراتىلۋىن زاڭ جۇزىندە قاداعالاۋعا المادى. سول ۋاقىتتاعى كەتكەن اعاتتىقتىڭ سالدارى قازىرگى كەزدە التىنتوبە اۋىلى وكرۋگىنىڭ تۇرعىندارىنا جان كۇيزەلىسىن الىپ كەلىپ وتىر.

قازاقستان رەسپۋبليكاسىنىڭ تاريحىندا ەڭ العاشقى جەكەشەلەندىرۋ (پريۆاتيزاتسيا) ناۋقانىنا بيىل 28 جىل تولىپ وتىر. ال، مەنىڭ تۋعان ولكەم – التىنتوبە اۋىلى وكرۋگىنىڭ حالقى سياقتى رەسپۋبليكا بويىنشا قانشاما جەرسىز وتىرعان اۋىل وكرۋگتەرى بار بولۋى مۇمكىن. سوڭعى كەزدە اۋىلداردان قالاعا جۇمىسپەن، الەۋمەتتىك جاعدايىنىڭ ناشارلىعىنان كەتىپ جاتقان ازاماتتاردىڭ سانى دا كۇرت ارتقان. مۇنىڭ ءبارى دە كاسىپ جاسايمىن دەگەن ازاماتتاردىڭ جەرىنىڭ بولماۋىنىڭ سالدارىنان تۋىنداۋدا.

التىنتوبە اۋىلى وكرۋگىنىڭ جەرلەرىن «وڭتۇستىك» الەۋمەتتىك كاسىپكەرلىك كورپوراتسياسىنا كىمدەر جانە قانداي ماقساتتا وتكىزىپ جىبەردى؟
16 ءساۋىر 2010 جىلى سول ۋاقىتتاعى قازىعۇرت اۋدانىنىڭ اكىمى ت.اليەۆتىڭ اتلتىنتوبە اۋىلى وكرۋگىنىڭ بارلىق جەر تەلىمدەرىن «وڭتۇستىك» الەۋمەتتىك كاسىپكەرلىك كورپوراتسياسىنىڭ جارعىلىق كاپيتالىنا جەكە مەنشىك قۇقىقپەن وتكىزۋ تۋرالى قاۋلىسى شىعادى.

قاۋلىدا نە دەيدى؟
قاۋلىدا جەردى «وڭتۇستىك» الەۋمەتتىك كاسىپكەرلىك كورپوراتسياسىنىڭ جارعىلىق كاپيتالىنا جەكە مەنشىك قۇقىقپەن تاپسىرۋ ماقساتىندا «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ» تۋرالى زاڭىنىڭ باپتارىن نەگىزگە الىپ، التىنتوبە اۋىلى وكرۋگىنىڭ قوعامداستىق وكىلدەرى مەن ازاماتتاردىڭ كەلىسىمىن الدىق دەپ، قۇجاتتارعا قول قويدىرىپ، جەر ۋچاسكەسىنە قۇقىقتى تابىستاۋ كوميسسياسىنىڭ № 31 قورىتىندىسىمەن، «وڭتۇستىك» الەۋمەتتىك كاسىپكەرلىك كورپوراتسياسىنىڭ باسقارما توراعاسىنىڭ ورىنباسارى س.تۇربەكوۆتىڭ اكىمدىككە جازعان حاتىن نەگىزگە الىپ، اكىمدىكتىڭ №153 قاۋىلسى ارقىلى التىنتوبە شارۋاشىلىعىنىڭ 15935 (قازىعۇرت اۋدانى اكىمىنىڭ 16 ءساۋىر 2010 جىلعى № 153 قاۋلىسىندا 15935 گەكتار دەپ كورسەتىلگەن ەگىستىك، جايىلىم، سۋارمالى، شابىندىق جەرلەرىن قوسا العاندا) گەكتار جەر تەلىمدەرىن «وڭتۇستىك» اكك (الەۋمەتتىك كاسىپكەرلىك كورپوراتسياسى) اق-نىڭ مەنشىگىنە جەكە مەنشىك قۇقىقپەن بەرىپ جىبەرەدى. قازىعۇرت اۋدانى اكىمىنىڭ 16 ءساۋىر 2010 جىلعى № 153 قاۋلىسىندا جەردى «وڭتۇستىك» اكك اق-نا تابىستاۋ كەزىندە اكىمدىكتە تومەندە اتى اتالعان ازاماتتار قول قويىپ، حالىقتىڭ قۇقىن كورپوراتسياعا تابىستىپ، التىنتوبە اۋىلى وكرۋگىنىڭ جەرلەرىن وتكىزگەن:

1. اۋدان اكىمى – ت.اليەۆ
2. م.مومىنوۆ
3. گ.تاعاەۆا
4. ن.الىمباەۆ
5. ب.قىستاۋوۆ
6. ك.شايمەردەن

قاۋلىنى ىسكە اسىرىپ، ورىنداۋشىلار:
1. قازىعۇرت اۋداندىق جەر قاتىناستارى ءبولىمىنىڭ باستىعى – ا.قوجاحان
2. ت.تاعاەۆا
3. كەڭەسشى – د.كۋليموۆ
4. جالپى ءبولىم مەڭگەرۋشىسى – ا.وسەرباەۆ

مىنە، جەر ۋچاسكەسىنە قۇقىقتى حالىقتىڭ اتىنان تابىستاعان ادامدار وسىلار. وسى ازاماتتاردىڭ حالىقتىڭ قۇقىن تاپتاعان ارەكەتىنەن كەيىن، التىنتوبە اۋىلى وكرۋگىندەگى تۇرعىنداردىڭ تىنىشتىعى بۇزىلدى. تاۋەلسىزدىك العان جىلداردان باستاپ قۇقى تاپتالعان حالىقتىڭ مۇددەسى جەرلىگىكتى اكىمشىلىكتىڭ تاراپىنان ەسكەرۋسىز قالىپ، جىل سايىن داۋ-داماي مەن بەرەكەسىزدىك بۇگىنگى كۇنگە دەيىن جالعاسىن تاۋىپ كەلەدى. مۇحتار يساباەۆ باستاعان التىنتوبە اۋىلى وكرۋگىنىڭ باستاماشى توبىنان قۇرالعان ازاماتتارى تالاي جىلدار بويى ءوزىنىڭ جەرىن داۋلاپ، كووپەراتيۆ اشىپ، كورپوراتسياعا باردى. بىراق ەشقانداي دا ناتيجە بولمادى. ولار ەلباسىنىڭ اۋىلشارۋاشىلىعىنىڭ كووپەراتيۆتەرىن ىرىلەندىرۋ ساياساتىن دا ەسكەرمەي، حالىققا ءوزىنىڭ جەرىن قايتارماي، ءارتۇرلى الداۋلارمەن شىعارىپ سالدى.

التىنتوبە اۋىلى وكرۋگىنىڭ ازاماتتارى اۋدان اكىمشىلىگى مەن اۋداندىق جەر قاتىناستارى باسقارماسىنىڭ تابالدىرىعىن توزدىردى. وبلىس اكىمشىلىگى مەن وبلىستىق قۇزىرلى ورگانداردىڭ ەسىكتەرىن دە توزدىردى. ەڭ سوڭىندا ءبىر ەمەس، ەكى بىردەي قر اۋىلشارۋاشىلىعى مينيسترلىگىنىڭ دە تابالدىرىعىن توزدىردى. ءبارىنىڭ ادىنان ءوتتى. ءبارىنىڭ جاۋابىن الدى. قۇجاتتاردىڭ ءبارى قولىمىزدا. اقىر سوڭىندا التىنتوبە اۋىلى وكرۋگىنىڭ بارلىق جەر تەلىمدەرى جەرگىلىكتى حالىقتىڭ مۇددەسىنە شەشىلمەدى.

وسى ۇزاق ۋاقىت بويى جالعاسقان جايسىز ارەكەتتەردى تۇسىنگەن، ءتۇبى جەرىنەن ايىرىلسا، اۋىلىنان كوشىپ كەتۋگە ءماجبۇر بولاتىنىن ويلاعان التىنتوبە اۋىلى وكرۋگىنىڭ جاستارى مەن ازاماتتارى باس قوسىپ، حالىقتىڭ بولاشاعى مەن كەلەشەگى ءۇشىن، مۇددەسى مەن پرەسپەكتيۆاسى ءۇشىن باستاماشى توپ قۇرىپ، جەردى حالىقتىڭ مۇددەسىنە شەشۋ ماقساتىندا ىسكە كىرىسىپ كەتتى. جەرگىلىكتى اتقارۋشى ورگاندار حالىققا ەشقانداي دا التەرناتيۆا قالدىرماعان. جەر جوق. كاسىپ جوق. بەرەكە جوق. جىل سايىن جانجالداسقان حالىق.

وسى جاعدايدى ەسكەرە وتىرىپ، جۇمىستى جايىنا قويىپ، بۇل ماسەلەگە بەل بايلاپ كىرىسكەن جاستار توبىن جاساقتاپ، ءىستى باستادىق. مەن سىزدەرگە الداعى ۋاقىتتا تاۋەلسىزدىك العان جىلداردان بەرگى جالعاسقان سىبايلاستىق پەن حالىققا قارسى جاسالعان جايسىزدىقتاردىڭ ءبارىن باياندايمىن. ماتەريالداردىڭ ءبارىن فەيسبۋككە، الەۋمەتتىك اقپاراتتىق پورتالدارعا شىعارامىن. سەبەبى، بۇل ماسەلە بۇقارانىڭ الدىنا شىقپاسا، شەشىلمەيتىنىنە كوزىمىز جەتتى.

ءبىز التىنتوبە اۋىلى وكرۋگىندە باستاماشى توپ قۇرىپ، وكرۋگتىڭ جەرلەرىنە قاتىستى ءىس ماتەريالدارىن قازىعۇرت اۋداندىق سوتىنا تاپسىردىق. ەندى الداعى ۋاقىتتا جەرگە قاتىستى سوت پروتسەستەرى باستالاتىنىن ايتا كەتەمىز. ءبىز التىنتوبە اۋىلى وكرۋگىنىڭ 10 مىڭعا جۋىق حالقىنىڭ مۇددەسى ءۇشىن كۇرەستى باستادىق. بارلىعىڭىز دا بىزگە قولداۋ كورسەتىپ، ءىستىڭ وڭىنان شەشىلۋىنە ىقپال ەتۋلەرىڭىزدى سۇرايمىن. بۇل تەك قانا التىنتوبە اۋىلى وكرۋگىندە عانا ورىن الىپ جاتقان جاعداي ەمەس، بارلىق وبلىستار مەن اۋدانداردا بار جاعداي. ءبىزدىڭ اۋداندا جەر داۋى قاتتى اسقىنىپ، سوڭى توبەلەستەرگە ۇلاسىپ، ازاماتتارىمىز سوتتالىپ جاتىر. التىنتوبە اۋىلى وكتۋگىندە جەر داۋىنا قاتىستى 22 ادام تەرگەۋگە تارتىلىپ، 5 ازاماتتىڭ ۇستىنەن قىلمىستىق ءىس بويىنشا سوت پروتسەسى جۇرۋدە. قازىعۇرت اۋداندىق سوتىنىڭ سۋدياسى ءدۇريا امانتايقىزى وكرۋگتىڭ ازاماتتارى - يساباەۆ ابىلقاسىم مەن ورىمباەۆ جورابايعا 2021 جىلعى 08-قىركۇيەكتەگى № 5140-21-00-1/56 ساندى ءىس بويىنشا ەكى جىلدان اسا ۋاقىتقا باس بوستاندىعىنان ايىرۋ جازاسىن كەستى. قازىعۇرت اۋداندىق سوتى جەرىن قورعاعان ازاماتتاردى سوتتاپ جاتىر. بۇل جاعدايدى حالىقتى قورقىتىپ-ۇركىتۋ دەپ سانايمىز. مۇنىڭ ءبارىن ارنايى ماقالامەن تۇسىندىرەتىن بولامىن.

قۇرمەتتى، قاسىم-جومارت كەمەلۇلى!

تۇركىستان وبلىسى، قازىعۇرت اۋدانى، التىنتوبە اۋىلدىق وكرۋگىنىڭ تۇرعىندارى قازاقستاننىڭ حالقى. ولار بۇيرەگىنەن تەۋىپ شەتتەتەتىندەي وگەي حالىق بولىپ سىرتتان كەلگەن جوق. عاسىرلار بويى اتا-بابالارى وسىندا عۇمىر كەشكەن. اۋىلداعى ازاماتتاردىڭ بارلىعى وزدەرىنىڭ شارتتى جەر ۇلەسى قولىنا تيسە، شەت جاققا قاڭعىرماي، ءوز كاسىپتەرىن جۇرگىزۋگە مۇمكىندىك الار ەدى. بىراق جەرگىلىكتى وبلىس، اۋدان دەڭگەيىندەگى اتقارۋشى ورگاندار تاۋەلسىزدىك العان جىلداردان بەرى حالىققا جەرىن قايتارىپ بەرۋگە قۇقىق تانىتپاي وتىر. ازاماتتاردىڭ كوپشىلىگى وندىرىستىك كووپەراتيۆتەر اشىپ، كاسىپ جاسايمىن دەپ نيەتتىنەپ وتىر. بىراق ازاماتتارعا شارتتى جەر ۇلەسى بەرىلمەگەن. شارتتى جەر ۇلەسى بەرىلسە جەرگىلىكتى اۋىل تۇرعىندارىنا ورتا جانە شاعىن كاسىپتى جانداندىرۋعا مۇمكىندىك تۋار ەدى. قولدان جاساپ وتىرعان وسىنداي قۇيتىرقىلىقتاردىڭ ارقاسىندا بۇل مۇمكىن بولماي وتىر. ءبىزدىڭ ماڭايىمىزداعى جاڭابازار، كوكىبەل، تۇربات سياقتى اۋىل وكرۋگتەرىنىڭ تۇرعىندارىنىڭ بارلىعىندا كەڭەس وكىمەتىنەن قالعان شارۋاشىلىقتار تاراتىلىپ، وزدەرىنىڭ قر «جەر كودەكسىنىڭ» 103 بابىنا سايكەس شارتتى جەر ۇلەستەرىن العان. بارلىعى دا ەمىن-ەركىن شارۋالارىن ىسكە اسىرىپ وتىر. الەۋمەتتىك جاعدايلارى دا ءبىزدىڭ اۋىل وكرۋگىنە قاراعاندا الدەقايدا جاقسى.

بىزگە دە زاڭ شەڭبەرىندە وسى مەحانيزمدى قولدانباسا، ازاماتتارعا قر «جەر كودەكسىنىڭ» 103 بابىنا سايكەس شارتتى جەر ۇلەسى بەرىلمەسە، وندا تالاي داۋ-داماي مەن قاقتىعىستار ورىن الىپ، حالىقتىڭ بەرەكەسى كەتىپ، اسقىنا بەرەتىن بولادى. سوڭى قانتوگىسكە دە الىپ كەلەتىن بولادى. سەبەبى، ءبىز اۋدان مەن وبلىستىڭ جەرگىلىكتى اتقارۋ ورگاندارىنىڭ تاۋەلسىزدىك العان جىلداردان بەرى حالىقتىڭ مۇددەسىنە شەشپەي كەلگەن جەر داۋىن قازىر ءوز ەركىمەن شەشەتىنىنە سەنبەيمىز. قازىر جەرگىلىكتى اتقارۋشى ورگاندار ازاماتتاردى ازاماتتىق ىسپەن ەمەس، قىلمىستىق ىسپەن سوتتاپ جاتىر. بۇل قيسىنعا كەلمەيتىن ارەكەت ءارى جەرگىلىكتى بيلىكتىڭ حالىقتى باسىنۋى دەپ سانايمىز. سوندىقتان دا مەملەكەتىمىزدىڭ باسشىسى دەپ، ارىزىمىزدى سىزگە جەتكىزىپ وتىرمىز!

اتالمىش ماقالا رەداكتسيانىڭ پوزيتسياسىن بىلدىرمەيدى. قارسى تاراپتىڭ دا وي-پىكىرىن جاريالاۋعا دايىنبىز.

بەكبولات قارجان،

"ادىرنا" ۇلتتىق پورتالى

پىكىرلەر