ەلباسى مەن تاۋەلسىزدىك – ەگىز ۇعىم. ونى قازاقستاننىڭ قازىرگى تاريحىنا كۋا بولعان ءاربىر ازامات بىلەدى.
بۇل پايىمدى حالىقارالىق جانە وتاندىق ساراپشىلار دا ءجيى ايتادى. سەبەبى ەلباسى نۇرسۇلتان نازارباەۆ ەلىمىزگە تاۋەلسىزدىك الۋدىڭ باسىندا بولىپ، بۇل كيەلى ۇعىمدى ءدۇيىم حالىققا ۇعىندىرا ءبىلدى.
ەلباسىنىڭ تاۋەلسىزدىك جىلدارىنداعى ەڭبەگىن ۇلىبريتانيا لوردى دجەيمس ۋورتون دا باعالاعان ەدى.
«قازاقستان ايماق پەن ودان تىس جەرلەردە ارتىپ كەلە جاتقان ءرول اتقارا باستادى. ەلباسىنىڭ باسشىلىعىمەن كوپتەگەن جەتىستىككە قول جەتكىزىلگەنى انىق. بۇل ءبىزدىڭ ۇرپاقتارىمىزدىڭ تاماشا بولاشاعىنىڭ نەگىزىن قالادى. ءبىز مۇنى ساياسي پىكىرتالاستاردا كورەمىز. كەيبىر قۇجاتتارمەن تانىسۋعا مۇمكىندىك الدىم. ماسەلەن، «100 ناقتى قادامدى» ەلباسى بولاشاق دامۋ جوسپارى رەتىندە ازىرلەدى»، – دەدى لورد دجەيمس ۋورتون «قازاقستاننىڭ پارتيالىق-ساياسي جۇيەسىنىڭ ەۆوليۋتسياسى» حالىقارالىق فورۋمىندا.
«جاراسىم» رەسپۋبليكالىق جاستار قوزعالىسىنىڭ توراعاسى تيمۋر جۇمىرباەۆ ەلباسى مەن تاۋەلسىزدىكتى ءبولىپ جارىپ ايتۋعا بولمايتىنىن ايتادى.
ەلباسىنىڭ ساليقالى ساياساتىنىڭ ناتيجەسىندە ەلىمىز كەڭەس وداعىنىڭ قۇرساۋىنان شىعىپ، تاۋەلسىز ەلگە اينالدى. بارلىعى باسىنان وسىلاي جاقسى بولىپ كەتتى دەپ تە ايتۋعا بولمايدى. 30 جىل ىشىندە ساياسي-الەۋمەتتىك، ەكونوميكالىق كەزەڭدەردى باستان وتكەردىك. بۇگىنگى دەڭگەيىمىزدى قاراساق، 30 جىل بۇرىن قالالار جىلۋسىز، مۇعالىمدەر مەن دارىگەرلەر ايلار بويى جالاقى الماي ءجۇرىپ، نارىقتىق ەكونوميكا بولماعانىنا سەنۋ وتە قيىن. قازىر قازاقستاننىڭ ەكونوميكاسى نارىقتىق ءارى شەتەلدىك نارىقتارمەن تىعىز بايلانىس ورناتقان. 30 جىلدا ەلباسى ساياساتىنىڭ ارقاسىندا الەمگە تانىمال، كوپ كەلىسسوزدەردىڭ ورداسىنا اينالعان ەلوردامىز دا كوبىنىڭ كوڭىلىنەن شىعادى. وسىنىڭ بارلىعىن سارالاي كەلە ەلباسى مەن تاۋەلسىزدىكتى ءبولىپ-جارۋعا كەلمەيتىنىن كورۋگە بولادى، – دەدى ول.
