تاۋەلسىزدىك جىلدارىنىڭ العاشقى سىناقتارىنان قازاق حالقى دارا باسشىلىعىمەن سۇرىنبەي ءوتتى. بۇل تۋرالى پرەزيدەنت قاسىم-جومارت توقاەۆ قر تاۋەلسىزدىگىنىڭ 30 جىلدىعىنا وراي سالتاناتتى جيىندا ايتتى.
«ەلباسى ءوزىنىڭ ءبىر سۇحباتىندا ازاتتىقتىڭ العاشقى اسەرىن ەسكە العانى بار. وندا جۇرتتىڭ ءبارى ءماز-مەيرام بولىپ جاتتى. مەنىڭ دە قۋانىشىمدا شەك جوق ەدى. بىراق قاتتى قوبالجىدىم. ويتكەنى ءارى قاراي نە بولارىنا الاڭداۋلى ەدىم» دەگەن بولاتىن. بۇل ءشۇباسىز اقيقات. ەلباسى ايتقانداي، تاۋەلسىزدىكتى الۋ ءبىر باسقا، ونى ساقتاپ قالۋ ءبىر باسقا. پرەزيدەنتتىڭ الدىندا جاڭا مەملەكەت قۇرۋ مىندەتى تۇردى»، - دەگەن مەملەكەت باسشىسى ەلباسىنىڭ الدىندا وزىنە سەنىم ارتقان حالىقتى قيىندىقتان الىپ شىعۋ مىندەتى تۇرعانىن ەسكە الدى.
«ەلدەگى سان ءتۇرلى ماسەلەنى شەشۋدىڭ باستى جاۋاپكەرشىلىگى مەملەكەت باسشىسىنا جۇكتەلدى. سونىڭ ءبارىن تۇڭعىش پرەزيدەنتىمىز ابىرويمەن ەڭسەرە ءبىلدى. تۇپتەپ كەلگەندە نۇرسۇلتان ءابىشۇلى نازارباەۆ حالقىمىزدىڭ ۇلى پەرزەنتى ەكەنىن ءوز ەڭبەگى ارقىلى تولىق دالەلدەدى.
جۇرتىمىز ونىڭ دارا باسشىلىعىمەن كەدەرگىنىڭ بارىنەن سۇرىنبەي ءوتتى. بۇگىنگى مەرەيلى مەملەكەتىمىز – ەلباسىمىزدىڭ ەرەن ەڭبەگىنىڭ جەمىسى»، - دەدى قاسىم-جومارت توقاەۆ.
