مەملەكەت باسشىسى قاسىم-جومارت توقاەۆ ەلىمىزدىڭ تاۋەلسىزدىكتى نىعايتۋداعى ەلباسى نۇرسۇلتان نازارباەۆتىڭ تاريحى ءرولىن اتادى.
«ءبىز مەملەكەتىمىزدىڭ ەڭ باستى مەرەكەسى – تاۋەلسىزدىك كۇنىن اتاپ وتۋگە دايىندالىپ جاتىرمىز. وسى كۇندەرى ءبىز قر تۇڭعىش پرەزيدەنتى نۇرسۇلتان ءابىشۇلى نازارباەۆتىڭ قازاقستان مەملەكەتىن قۇرۋداعى، ەلىمىزدىڭ ەگەمەندىگى مەن تاۋەلسىزدىگىن نىعايتۋداعى تاريحي ءرولىن اتاپ وتۋدەمىز. سونىمەن قاتار ءبىز قازاقستان رەسپۋبليكاسىنىڭ تۇڭعىش پرەزيدەنتىنىڭ ەۋرازيالىق ەكونوميكالىق وداقتى قۇرۋ باستاماسىن كوتەرگەن تاريحي فاكتىسىن دە ەسكە سالعانىمىز ءجون. وسىنىڭ ارقاسىندا ءبىز بۇگىن كەزەكتى وتىرىسىمىزدى وتكىزىپ جاتىرمىز»، - دەدى قاسىم-جومارت توقاەۆ جوعارى ەۋرازيالىق ەكونوميكالىق كەڭەستىڭ وتىرىسىندا.
مەملەكەت باسشىسى وتىرىس بارىسىندا قازاقستان تاۋەلسىزدىگىنىڭ 30 جىلدىعىنا وراي بۇگىن ايتىلعان قۇتتىقتاۋلارعا العىسىن جەتكىزدى.
«سونىمەن بىرگە، قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي قۇتتىقتاۋلار مەن رەسمي جەدەلحاتتار ءتۇسىپ جاتىر. مەنىڭ ويىمشا، بۇرىنعىداي بىرلەسە جۇمىس ىستەي وتىرىپ، ءبىز حالىقتاردىڭ يگىلىگىنە قىزمەت ەتەمىز»، - دەدى قر پرەزيدەنتى.
بۇدان بۇرىن حابارلانعانداي، قر پرەزيدەنتى قاسىم-جومارت توقاەۆتىڭ توراعالىعىمەن جوعارى ەۋرازيالىق ەكونوميكالىق كەڭەستىڭ وتىرىسى (جەەك) ءوتىپ جاتىر.
