شىمكەنتتە قاراپايىم قىزمەتكەرلەرگە قۇرمەت كورسەتىلدى

3857
Adyrna.kz Telegram

شىمكەنتتە قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي كوپ جىلدان بەرى ايانباي ەڭبەك ەتىپ كەلە جاتقان ارناۋلى الەۋمەتتىك وڭالتۋ ورتالىقتارىنىڭ سانيتارلىق جانە تەحنيكالىق ماماندارى مەن قالالىق جۇمىسپەن قامتۋ جانە الەۋمەتتىك قورعاۋ باسقارماسى، قالالىق تۇرعىن ءۇي باسقارماسى، قالالىق ەكونوميكا جانە بيۋدجەتتىك جوسپارلاۋ، مەملەكەتتىك ساتىپ الۋ باسقارماسىنىڭ قىزمەتكەرلەرى ماراپاتتالدى.

ەلىمىزدىڭ جانە قالانىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقان ازاماتتارعا مەرەكەلىك مەدالدى شىمكەنت قالاسى اكىمىنىڭ ورىنباسارى ەرعالي بىلىسبەكوۆ تابىستادى. قالا باسشىسىنىڭ ورىنباسارى سالتاناتتى راسىمدە ماراپات يەلەرىن ەلىمىزدىڭ قاستەرلى مەرەكەسىمەن قۇتتىقتاپ، قوعامنىڭ سان سالاسىندا اتقارىپ جۇرگەن ەرەن ەڭبەكتەرىنىڭ ماڭىزىن اتاپ ءوتتى.

-16 جەلتوقسان اتا-بابالارىمىزدىڭ سان عاسىر بويعى اسقاق ارمانى ورىندالىپ، تاۋەلسىزدىككە قول جەتكىزگەن تاريحي كۇن! وسىناۋ ايتۋلى كۇنى سىزدەردى قازاقستان رەسپۋبليكاسى تاۋەلسىزدىگىنىڭ 30 جىلدىعىمەن قۇتتىقتايمىن! ەلىمىز دارا جولىمەن وسى ۋاقىت ارالىعىندا كۇردەلى، سان سىناققا ۇشىراعان ءبىر ءداۋىردى وتكەردى. قول جەتكىزگەن جەتىستىگىمىزدە سىزدەردىڭ دە وراسان ۇلەستەرىڭىز بار. ەل بىرلىگى مەن ىنتىماعى، بارشا ازاماتتاردىڭ قاجىرلى ەڭبەگى قايتا جاڭعىرعان مەملەكەتىمىزدىڭ قۇدىرەتتى كۇشى بولدى، -دەدى شىمكەنت قالاسى اكىمىنىڭ ورىنباسارى ەرعالي بىلىسبەكوۆ.

جالپى، سالتاناتتى شارادا 20-عا جۋىق ءتۇرلى سالا ۇزدىكتەرى قازاقستان رەسپۋبليكاسىنىڭ تاۋەلسىزدىگىنە 30 جىل مەرەكەلىك توسبەلگىسىنە يە بولدى.

پىكىرلەر