Shymkentte Qazaqstan Respýblıkasy Táýelsizdiginiń 30 jyldyǵyna oraı kóp jyldan beri aıanbaı eńbek etip kele jatqan arnaýly áleýmettik ońaltý ortalyqtarynyń sanıtarlyq jáne tehnıkalyq mamandary men qalalyq jumyspen qamtý jáne áleýmettik qorǵaý basqarmasy, qalalyq turǵyn úı basqarmasy, qalalyq ekonomıka jáne bıýdjettik josparlaý, memlekettik satyp alý basqarmasynyń qyzmetkerleri marapattaldy.
Elimizdiń jáne qalanyń áleýmettik-ekonomıkalyq damýyna eleýli úles qosqan azamattarǵa merekelik medaldy Shymkent qalasy ákiminiń orynbasary Erǵalı Bilisbekov tabystady. Qala basshysynyń orynbasary saltanatty rásimde marapat ıelerin elimizdiń qasterli merekesimen quttyqtap, qoǵamnyń san salasynda atqaryp júrgen eren eńbekteriniń mańyzyn atap ótti.
-16 jeltoqsan ata-babalarymyzdyń san ǵasyr boıǵy asqaq armany oryndalyp, táýelsizdikke qol jetkizgen tarıhı kún! Osynaý aıtýly kúni sizderdi Qazaqstan Respýblıkasy Táýelsizdiginiń 30 jyldyǵymen quttyqtaımyn! Elimiz dara jolymen osy ýaqyt aralyǵynda kúrdeli, san synaqqa ushyraǵan bir dáýirdi ótkerdi. Qol jetkizgen jetistigimizde sizderdiń de orasan úlesterińiz bar. El birligi men yntymaǵy, barsha azamattardyń qajyrly eńbegi qaıta jańǵyrǵan memleketimizdiń qudiretti kúshi boldy, -dedi Shymkent qalasy ákiminiń orynbasary Erǵalı Bilisbekov.
Jalpy, saltanatty sharada 20-ǵa jýyq túrli sala úzdikteri Qazaqstan Respýblıkasynyń Táýelsizdigine 30 jyl merekelik tósbelgisine ıe boldy.
