تۇعىرلى تۇلعالاردىڭ ەستەلىكتەرى جاريالاندى

3908
Adyrna.kz Telegram

ءال-فارابي اتىنداعى قالالىق عىلىمي-امبەباپ كىتاپحاناسىندا ەل تاۋەلسىزدىگىنىڭ 30 جىلدىعىنا وراي جارىق كورگەن "عاسىرعا بەرگىسىز 30 جىل" كىتابىنىڭ تۇساۋكەسەرى ءوتتى. جيىنعا شىمكەنت قالاسى اكىمىنىڭ ءبىرىنشى ورىنباسارى ش.مۇقان جانە قالانىڭ دامىپ-وركەندەۋىنە ۇلەس قوسقان ارداگەرلەر قاۋىمى قاتىستى.

— سىزدەردى ءتاۋ ەتەر تاۋەلسىزدىگىمىزدىڭ 30 جىلدىق مەرەكەسىمەن شىن جۇرەكتەن قۇتتىقتايمىن! ىنتىماق پەن بىرلىكتىڭ ارقاسىندا ەلىمىز وتپەلى كەزەڭنىڭ قيىندىقتارىن ءساتتى ەڭسەرىپ، دەربەس دامۋ مەن وركەندەۋ جولىنا ءتۇستى. سىزدەر تاۋەلسىزدىكتىڭ العاشقى جىلدارىنداعى ەڭ كۇردەلى كەزەڭدەردى، سىندارلى شاقتاردى باستان وتكىزدىڭىزدەر. وتپەلى كەزەڭنىڭ بارلىق اۋىرتپالىقتارىن كوتەرە بىلدىڭىزدەر! سول ارقىلى وسىنداي تاۋەلسىز ۇرپاقتىڭ قالىپتاسۋىنا جاعداي جاسادىڭىزدار!
سونىمەن قاتار بۇگىن ءبىز «عاسىرعا بەرگىسىز 30 جىل: تۇعىرلى تۇلعالار ەستەلىكتەرى» اتتى كىتاپتىڭ تۇساۋىن كەسەمىز. شىمكەنت قالالىق ارداگەرلەر ۇيىمىنىڭ جانە ونىڭ توراعاسى كەنجەحان تولەباەۆ اعامىزدىڭ جيناقتاۋىمەن جارىق كورگەن بۇل كىتاپتا شىمكەنت قالاسىندا ءار جىلدارى جاۋاپتى قىزمەتتەر اتقارىپ، قالانىڭ دامۋى مەن وركەندەۋىنە ۇلەس قوسقان ازاماتتاردىڭ ەستەلىكتەرى جيناقتالعان.
كىتاپتا شاھاردىڭ 30 جىلداعى دامۋ شەجىرەسى باياندالعان،- دەدى شىڭعىس جۇمابەكۇلى.
سالتاناتتى شارا بارىسىندا ءتۇرلى سالادا ەڭبەك ەتكەن ارداگەرلەرگە «قر تاۋەلسىزدىگىنە 30 جىل» مەرەكەلىك مەدالى تابىس ەتىلدى. «عاسىرعا بەرگىسىز 30 جىل» جيناعى شىمكەنت قالالىق ارداگەرلەر كەڭەسىنىڭ توراعاسى ك. تولەباەۆتىڭ جيناقتاۋىمەن، قر جۋرناليستەر وداعىنىڭ مۇشەلەرى س. ورازالىۇلى مەن
ن. ورىمبايدىڭ رەداكتسيالاۋىمەن جارىق كورىپ وتىر.
ايتا كەتەيىك، كىتاپ ءۇش بولىمنەن تۇرادى. العاشقى بولىمگە مەملەكەت جانە قوعام قايراتكەرلەرى، وبلىس، قالا باسشىلارىنىڭ، ەكىنشى بولىمدە قۇقىق قورعاۋ سالاسى ارداگەرلەرىنىڭ، ءۇشىنشى بولىمدە مادەنيەت، ءبىلىم، دەنساۋلىق سالاسى ماماندارىنىڭ ەستەلىكتەرى توپتاستىرىلعان.

زاميرا الدابەرگەنوۆا
سۋرەتتى تۇسىرگەن س. قوساەۆ

پىكىرلەر