Ál-Farabı atyndaǵy qalalyq ǵylymı-ámbebap kitaphanasynda el Táýelsizdiginiń 30 jyldyǵyna oraı jaryq kórgen "Ǵasyrǵa bergisiz 30 jyl" kitabynyń tusaýkeseri ótti. Jıynǵa Shymkent qalasy ákiminiń birinshi orynbasary Sh.Muqan jáne qalanyń damyp-órkendeýine úles qosqan ardagerler qaýymy qatysty.
— Sizderdi táý eter Táýelsizdigimizdiń 30 jyldyq merekesimen shyn júrekten quttyqtaımyn! Yntymaq pen birliktiń arqasynda elimiz ótpeli kezeńniń qıyndyqtaryn sátti eńserip, derbes damý men órkendeý jolyna tústi. Sizder Táýelsizdiktiń alǵashqy jyldaryndaǵy eń kúrdeli kezeńderdi, syndarly shaqtardy bastan ótkizdińizder. Ótpeli kezeńniń barlyq aýyrtpalyqtaryn kótere bildińizder! Sol arqyly osyndaı táýelsiz urpaqtyń qalyptasýyna jaǵdaı jasadyńyzdar!
Sonymen qatar búgin biz «Ǵasyrǵa bergisiz 30 jyl: tuǵyrly tulǵalar estelikteri» atty kitaptyń tusaýyn kesemiz. Shymkent qalalyq ardagerler uıymynyń jáne onyń tóraǵasy Kenjehan Tólebaev aǵamyzdyń jınaqtaýymen jaryq kórgen bul kitapta Shymkent qalasynda ár jyldary jaýapty qyzmetter atqaryp, qalanyń damýy men órkendeýine úles qosqan azamattardyń estelikteri jınaqtalǵan.
Kitapta shahardyń 30 jyldaǵy damý shejiresi baıandalǵan,- dedi Shyńǵys Jumabekuly.
Saltanatty shara barysynda túrli salada eńbek etken ardagerlerge «QR Táýelsizdigine 30 jyl» merekelik medali tabys etildi. «Ǵasyrǵa bergisiz 30 jyl» jınaǵy Shymkent qalalyq ardagerler keńesiniń tóraǵasy K. Tólebaevtyń jınaqtaýymen, QR Jýrnalıster Odaǵynyń músheleri S. Orazalyuly men
N. Orymbaıdyń redakııalaýymen jaryq kórip otyr.
Aıta keteıik, kitap úsh bólimnen turady. Alǵashqy bólimge memleket jáne qoǵam qaıratkerleri, oblys, qala basshylarynyń, ekinshi bólimde quqyq qorǵaý salasy ardagerleriniń, úshinshi bólimde mádenıet, bilim, densaýlyq salasy mamandarynyń estelikteri toptastyrylǵan.
Zamıra ALDABERGENOVA
Sýretti túsirgen S. QOSAEV
