ءۇشىنشى مەگاپوليستىڭ سپورتشىلارى 2021 جىلدى تابىستى اياقتادى. ەل تاۋەلسىزدىگىنىڭ 30 جىلدىعى مەرەيتويى قارساڭىندا جانە «جۇلدىزدى 30 كۇن» ءىس-شاراسى اياسىندا شىمكەنت قالاسىنىڭ سپورتشىلارى جاس ەرەكشەلىكتەرىنە قاراي الەم چەمپيوناتتارىندا 30 التىن، 24 كۇمىس جانە 24 قولا مەدالعا يە بولعان. بۇل تۋرالى قالالىق كورمە ورتالىعىندا وتكەن سالتناتتى جيىندا قالا اكىمىنىڭ ورىنباسارى ماقسۇت يساحوۆ مالىمدەدى.
جيىندا ءسوز العان ماقسۇت پەرنەبايۇلى سپورت سالاسىنىڭ ۇزدىكتەرى مەن جاتتىقتىرۋشىلاردى ەلىمىزدىڭ ەڭ باستى مەرەكەسى – 30 جىلدىق مەرەيتويىمەن ءارى ەرەكشە مانگە يە تاۋەلسىزدىك كۇنىمەن قۇتتىقتادى.
– تاۋەلسىزدىكتىڭ ارقاسىندا ەلىمىز، قالامىز ءوسىپ، دامىپ كەلەدى. ءۇشىنشى مەگاپوليستىڭ سپورتشىلارى دا ەلدىڭ داڭقىن شىعارىپ، مەملەكەتىمىزدى الەمگە تانىتۋدا كۇش سالۋدا. 23 شىلدە مەن 8 تامىز ارالىعىندا جاپونيانىڭ توكيو قالاسىندا وتكەن XXXII جازعى وليمپيادا ويىندارىنا قالامىزدان ۇلتتىق قۇراما ساپىندا سپورتتىڭ 7 تۇرىنەن 10 سپورتشى، پاراليمپيادا ويىندارىندا 1 سپورتشى ەل نامىسىن قورعادى. وليمپيادا ويىندارىنىڭ ناتيجەسىندە كاراتە سپورت تۇرىنەن ەكى سپورتشىمىز ەكى قولا مەدالدى ەل قورجىنىنا سالسا، بوكستان ءبىر سپورتشىمىز جارىستى 5-ءشى ورىنمەن اياقتادى. سونىمەن قاتار ازيا چەمپيوناتتارىندا شىمكەنت قالاسىنىڭ سپورتشىلارى ەدaۋىر جەتىستىكتەرگە جەتىپ 36 التىن، 30 كۇمىس جانە 18 قولا مەدالعا يە بولعان. قازاقستان رەسپۋبليكاسىنىڭ چەمپيوناتتارىندا 477 التىن، 365 كۇمىس جانە 420 قولا مەدالدى جەڭىپ العان. سونداي-اق، 2021 جىلى وڭىردەن قازاقستان رەسپۋبليكاسىنىڭ قۇراما ساپىنا 885 سپورتشىمىز ەنگەنىن ايتا كەتۋ كەرەك. قۇرمەتتى سپورتشىلار، جاتتىقتىرۋشىلار الداعى بولاتىن ۇلكەن دودالاردا تاۋەلسىز ەلىمىزدىڭ نامىسىن قورعاپ، جەڭىس تۇعىرىنان كورىنەتىندەرىڭىزگە كامىل سەنەمىن، - دەدى م.يساحوۆ.
جيىن بارىسىندا ماقسۇت پەرنەبايۇلى سپورتتا جەتكەن جەتىستىكتەرى ءۇشىن سپورتشىلار مەن جاتتىقتىرۋشىلاردى، قازاقستان رەسپۋبليكاسى مادەنيەت جانە سپورت مينيسترلىگىنىڭ شەشىمىمەن 2021 جىلدىڭ قازاقستان رەسپۋبليكاسىنىڭ «ۇزدىك سپورت مەكتەبى» اتانعىنا يە بولعان شىمكەنت قالاسىنىڭ جوعارى سپورت شەبەرلىگى مەكتەبىنىڭ ۇجىمىن شىمكەنت قالاسى اكىمىنىڭ اتىنان قۇتتىقتادى. سپورتشىلارعا ارنايى ديپلوم، ستاتۋەتكا مەن قارجىلاي سىيلىقتار تابىستالدى.
ا.جادىگەرۇلى
