شىمكەنت قالاسى اكىمىنىڭ ورىنباسارى ەرعالي بىلىسبەكوۆ تۇرعىنداردى جەكە ماسەلەلەرى بويىنشا ونلاين قابىلدادى. قابىلداۋدا كوپبالالى جانە تولىق ەمەس وتباسى، مۇگەدەك بالا تاربيەلەۋشى جانە مۇگەدەك ساناتىنداعى ازاماتتار بولدى.
تۇرعىنداردى تولعاندىرعان باسپانا كەزەگى ماسەلەسى جان-جاقتى تالقىلانىپ، قاجەتتى مالىمەتتەر دەرەگى ايتىلدى. ازاماتتار وزدەرىن الاڭداتقان ساۋالدارىنا ءتيىستى جاۋاپ الدى.
قالا باسشىسىنىڭ ورىنباسارى قابىلداۋدا بولعان ءار ازاماتتىڭ ماسەلەسىن جەكە تىڭداپ، نازارعا الدى. باسقارما باسشىلارىنا ءتيىستى تاپسىرمالار بەرىلدى.
بيىل قالادا 976 وتباسىنى ارەندالىق پاتەرمەن قامتۋ جوسپارلانعان. بۇگىندە 813 وتباسى پاتەرمەن قامتىلىپ وتىر. ونىڭ ىشىندە اتا-اناسىنىڭ قامقورلىعىنسىز قالعان 60 بالا، 240 كوپبالالى وتباسى، حالىقتىڭ الەۋمەتتىك جاعىنان ءالسىز توبى 212 جانە جۇمىس ىستەيتىن 300 جاس بار. قالعان پاتەرلەر تۇرعىن ءۇي كەزەگىنە تىركەلگەن ازاماتتارعا تۇرعىن ۇيلەردىڭ پايدالانۋعا بەرىلۋىنە بايلانىستى ۇلەستىرىلەتىن بولادى.
باسپاناعا مۇقتاج ازاماتتارعا جەڭىلدەتىلگەن يپوتەكالىق نەسيەلەر بويىنشا دا قولداۋ كورسەتىلۋدە. «باقىتتى وتباسى» باعىتى بويىنشا بيىل قالادا 255 وتباسى، اتاپ ايتقاندا 104 كوپبالالى، 133 مۇگەدەك بالا اسىراۋشى جانە 18 تولىق ەمەس وتباسى نەسيە نەگىزىندە باسپاناعا يە بولدى. ونىڭ ىشىندە 152 وتباسىعا جەرگىلىكتى بيۋدجەت ەسەبىنەن العاشقى جارناسىنىڭ ءبىر بولىگىن جابۋ ءۇشىن 1 ميلليون تەڭگەلىك تۇرعىن ءۇي سەرتيفيكاتتارىمەن كومەك بەرىلدى.
ال تۇران شاعىن اۋدانىنداعى 27 كوپقاباتتى ءۇي (1728 پاتەر) «5-10-20 شاڭىراق» باعدارلاماسى اياسىندا تۇرعىن ءۇي الۋ تىزىمىندە تىركەلگەندەر ازاماتتارعا «وتباسى بانكى» ارقىلى نەسيە نەگىزىندە ۇلەستىرۋ كوزدەلگەن.
11 ايدا «شاڭىراق» جەڭىلدەتىلگەن نەسيەلىك باعدارلاماسى بويىنشا 1427 وتباسىمەن كەلىسىم شارت تۇزىلگەن. ونىڭ ىشىندە 267 وتباسىعا تۇرعىن ءۇي سەرتيفيكاتى بەرىلدى.
قر «تۇرعىن ءۇي قاتىناستارى تۋرالى» زاڭىنا سايكەس مەملەكەتتىك تۇرعىن ءۇي قورىنان بەرىلەتىن ۇيلەر تەك كەزەك ارقىلى جۇزەگە اسىرىلادى.
شىمكەنت قالاسى اكىمدىگىنىڭ ءباسپاسوز قىزمەتى
