Shymkent qalasy ákiminiń orynbasary Erǵalı Bilisbekov turǵyndardy jeke máseleleri boıynsha onlaın qabyldady. Qabyldaýda kópbalaly jáne tolyq emes otbasy, múgedek bala tárbıeleýshi jáne múgedek sanatyndaǵy azamattar boldy.
Turǵyndardy tolǵandyrǵan baspana kezegi máselesi jan-jaqty talqylanyp, qajetti málimetter deregi aıtyldy. Azamattar ózderin alańdatqan saýaldaryna tıisti jaýap aldy.
Qala basshysynyń orynbasary qabyldaýda bolǵan ár azamattyń máselesin jeke tyńdap, nazarǵa aldy. Basqarma basshylaryna tıisti tapsyrmalar berildi.
Bıyl qalada 976 otbasyny arendalyq pátermen qamtý josparlanǵan. Búginde 813 otbasy pátermen qamtylyp otyr. Onyń ishinde ata-anasynyń qamqorlyǵynsyz qalǵan 60 bala, 240 kópbalaly otbasy, halyqtyń áleýmettik jaǵynan álsiz toby 212 jáne jumys isteıtin 300 jas bar. Qalǵan páterler turǵyn úı kezegine tirkelgen azamattarǵa turǵyn úılerdiń paıdalanýǵa berilýine baılanysty úlestiriletin bolady.
Baspanaǵa muqtaj azamattarǵa jeńildetilgen ıpotekalyq nesıeler boıynsha da qoldaý kórsetilýde. «Baqytty otbasy» baǵyty boıynsha bıyl qalada 255 otbasy, atap aıtqanda 104 kópbalaly, 133 múgedek bala asyraýshy jáne 18 tolyq emes otbasy nesıe negizinde baspanaǵa ıe boldy. Onyń ishinde 152 otbasyǵa jergilikti bıýdjet esebinen alǵashqy jarnasynyń bir bóligin jabý úshin 1 mıllıon teńgelik turǵyn úı sertıfıkattarymen kómek berildi.
Al Turan shaǵyn aýdanyndaǵy 27 kópqabatty úı (1728 páter) «5-10-20 Shańyraq» baǵdarlamasy aıasynda turǵyn úı alý tiziminde tirkelgender azamattarǵa «Otbasy banki» arqyly nesıe negizinde úlestirý kózdelgen.
11 aıda «Shańyraq» jeńildetilgen nesıelik baǵdarlamasy boıynsha 1427 otbasymen kelisim shart túzilgen. Onyń ishinde 267 otbasyǵa turǵyn úı sertıfıkaty berildi.
QR «Turǵyn úı qatynastary týraly» Zańyna sáıkes memlekettik turǵyn úı qorynan beriletin úıler tek kezek arqyly júzege asyrylady.
Shymkent qalasy ákimdiginiń baspasóz qyzmeti
