شىمكەنتتە تاۋەلسىزدىك كۇنىنىڭ قارساڭىندا بىرقاتار جاڭا كاسىپورىندار ىسكە قوسىلدى. قالا اكىمى مۇرات ايتەنوۆ «GREEN CROSS ECO» كومپانياسىنىڭ «تاسساي» يندۋستريالدى ايماعىندا ورنالاسقان ءينسۋليندى شپريتستەر مەن ونىڭ ينەلەرىن وندىرەتىن زاۋىتتىڭ سالتاناتتى اشىلۋ راسىمىنە قاتىسىپ، لەنتاسىن قيدى.
–تاۋەلسىزدىك جىلدارىندا ەلىمىزدە يندۋستريالاندىرۋ ساياساتى بەلسەندى تۇردە جۇرگىزىلىپ كەلەدى. شىمكەنتتىڭ وزىندە 2 يندۋستريالدى، 1 ارنايى ەكونوميكالىق جانە 1 كولىك-لوگيستيكالىق ايماق جۇمىس ىستەپ تۇر. قازىر تاعى 3 يندۋستريالدى ايماق اشۋ بويىنشا جۇمىس جۇرگىزىپ جاتىرمىز. بۇگىن اشىلىپ وتىرعان كاسىپورىننىڭ دا ماڭىزى وتە زور. بۇعان دەيىن قانت ديابەتى بار ازاماتتارعا قاجەتتى ينسۋلين شپريتستەرى مەن ينەلەرى شەتەلدەن يممورتتالاتىن ەدى. ەندى ونىڭ ورنىن «GREEN CROSS ECO» كومپانياسى شىعاراتىن وتاندىق ءونىم الماستىرىپ وتىر. يننوۆاتسيالىق تەحنولوگيالار نەگىزىندە جۇمىس ىستەيتىن وسىنداي كاسىپورىنداردىڭ كوبەيۋى شىمكەنتتە بىلىكتىلىگى جوعارى ماماندار شوعىرىنىڭ قالىپتاسۋىنا اسەر ەتەدى، – دەگەن مۇرات دۇيسەنبەكۇلى كاسىپورىن قىزمەتكەرلەرىن تاۋەلسىزدىك كۇنى مەرەكەسىمەن جانە زاۋىتتىڭ اشىلۋىمەن قۇتتىقتادى.
شاھار باسشىسى تاۋەلسىزدىكتىڭ ءتورتىنشى ونجىلدىعىندا وسىنداي زاماناۋي كاسىپورىندار كوپتەپ اشىلىپ، شىمكەنت ەلدەگى ءىرى ونەركاسىپتىك ورتالىقتاردىڭ بىرىنە اينالاتىنىنا سەنىم ءبىلدىردى.
ايتا كەتەيىك، «GREEN CROSS ECO» كومپانياسىنىڭ زاۋىتىن اشۋعا 2 ميلليارد تەڭگە ينۆەستيتسيا قۇيىلعان. مۇندا 100 ادام تۇراقتى جۇمىسپەن قامتىلعان. زاۋىت جىلىنا 60 ميلليون دانا ينسۋلين شپريتستەرى مەن ينەلەرىن جانە يممۋنوفەرمەنتتى ءاناليزدىڭ 500 دياگنوستيكالىق جيىنتىعىن وندىرە الادى.
مۇنان بولەك قالا اكىمى «Silkway Alliance» ونەركاسىپتىك پاركىنىڭ اشىلۋىنا دا قاتىستى.
–شاعىن جانە ورتا كاسىپكەرلىكتى قولداۋ ماقساتىندا «ىسكەر قالا» اتتى باعدارلاما قابىلدادىق. باعدارلاما اياسىندا جەكە ينۆەستورلاردىڭ ەسەبىنەن وسىنداي ونەركاسىپتىك پاركتەر كوپتەپ اشىلادى. مۇندا شاعىن كاسىپورىن اشقىسى كەلەتىن بيزنەسمەندەرگە ينجەنەرلىك-ينفراقۇرىلىم جەلىلەرى تارتىلعان دايىن وندىرىستىك عيماراتتار ۇسىنىلادى. بۇل وتە ىڭعايلى. كاسىپكەرلەر وندىرىستىك قوندىرعىلارىن وسى جەرگە اكەلىپ ورناتادى دا، ەشتەڭەگە الاڭداماي جۇمىس ىستەي بەرەدى. باعدارلاما بويىنشا 1-ءشى جىلى وندىرىستىك عيماراتتى جالعا الۋ اقىسىنىڭ 75 پايىزى، 2-ءشى جىلى 50 پايىزى، ال، 3-ءشى جىلى 25 پايىزى بيۋدجەت ەسەبىنەن سۋبسيديالانادى. وعان قوسا وسى پاركتەردە كاسىپورىن اشقان كومپانيالارعا جىلدىق ۇستەماقىسى 1 پايىزدىق جەڭىلدەتىلگەن نەسيە بەرەمىز، – دەدى م.ايتەنوۆ.
ايتا كەتەيىك، جاڭادان اشىلىپ وتىرعان ونەركاسىپتىك پاركتە 1 065 شارشى مەتر كەڭسەلىك، 3 583 شارشى مەتر وندىرىستىك عيماراتتار سالىنعان. جوبانىڭ ەكىنشى كەزەڭىندە، ياعني، 2023 جىلعا قاراي تاعى 8 مىڭ شارشى مەتر وندىرىستىك عيماراتتار ىسكە قوسىلادى. ازىرگە مۇندا 8 شاعىن كاسىپورىن جۇمىسىن باستادى. اتاپ ايتقاندا، تۇرمىستىق حيميا، ونىڭ ىشىندە جۋ قۇرالدارىن شىعاراتىن تسەح، قۇرىلىس يندۋسترياسىنا ارنالعان ءتۇرلى قوسپالار شىعاراتىن زاۋىت، گيدروتاران وندىرەتىن تسەح جانە وزگەلەرى بار.
مۇنان كەيىن قالا اكىمى م.ايتەنوۆ «وڭتۇستىك» ارنايى ەكونوميكالىق ايماعىندا بولىپ، «Shymkent Qagazy» جاۋاپكەرشىلىگى شەكتەۋلى سەرىكتەستىگىنىڭ قاعاز جانە كارتون بۇيىمدار شىعاراتىن زاۋىتىنىڭ اشىلۋ سالتاناتىنا دا قاتىستى.
ايدار قۇلجانوۆ،
فوتو سەرىك قوساەۆ
