Şymkentte Täuelsızdık künınıŋ qarsaŋynda bırqatar jaŋa käsıporyndar ıske qosyldy. Qala äkımı Mūrat Äitenov «GREEN CROSS ECO» kompaniiasynyŋ «Tassai» industrialdy aimaǧynda ornalasqan insulindı şprister men onyŋ inelerın öndıretın zauyttyŋ saltanatty aşylu räsımıne qatysyp, lentasyn qidy.
–Täuelsızdık jyldarynda elımızde industrialandyru saiasaty belsendı türde jürgızılıp keledı. Şymkenttıŋ özınde 2 industrialdy, 1 arnaiy ekonomikalyq jäne 1 kölık-logistikalyq aimaq jūmys ıstep tūr. Qazır taǧy 3 industrialdy aimaq aşu boiynşa jūmys jürgızıp jatyrmyz. Bügın aşylyp otyrǧan käsıporynnyŋ da maŋyzy öte zor. Būǧan deiın qant diabetı bar azamattarǧa qajettı insulin şpristerı men inelerı şetelden immorttalatyn edı. Endı onyŋ ornyn «GREEN CROSS ECO» kompaniiasy şyǧaratyn otandyq önım almastyryp otyr. İnnovasiialyq tehnologiialar negızınde jūmys ısteitın osyndai käsıporyndardyŋ köbeiuı Şymkentte bılıktılıgı joǧary mamandar şoǧyrynyŋ qalyptasuyna äser etedı, – degen Mūrat Düisenbekūly käsıporyn qyzmetkerlerın Täuelsızdık künı merekesımen jäne zauyttyŋ aşyluymen qūttyqtady.
Şahar basşysy Täuelsızdıktıŋ törtınşı onjyldyǧynda osyndai zamanaui käsıporyndar köptep aşylyp, Şymkent eldegı ırı önerkäsıptık ortalyqtardyŋ bırıne ainalatynyna senım bıldırdı.
Aita keteiık, «GREEN CROSS ECO» kompaniiasynyŋ zauytyn aşuǧa 2 milliard teŋge investisiia qūiylǧan. Mūnda 100 adam tūraqty jūmyspen qamtylǧan. Zauyt jylyna 60 million dana insulin şpristerı men inelerın jäne immunofermenttı analizdıŋ 500 diagnostikalyq jiyntyǧyn öndıre alady.
Mūnan bölek qala äkımı «Silkway Alliance» önerkäsıptık parkınıŋ aşyluyna da qatysty.
–Şaǧyn jäne orta käsıpkerlıktı qoldau maqsatynda «Isker qala» atty baǧdarlama qabyldadyq. Baǧdarlama aiasynda jeke investorlardyŋ esebınen osyndai önerkäsıptık parkter köptep aşylady. Mūnda şaǧyn käsıporyn aşqysy keletın biznesmenderge injenerlık-infraqūrylym jelılerı tartylǧan daiyn öndırıstık ǧimarattar ūsynylady. Būl öte yŋǧaily. Käsıpkerler öndırıstık qondyrǧylaryn osy jerge äkelıp ornatady da, eşteŋege alaŋdamai jūmys ıstei beredı. Baǧdarlama boiynşa 1-şı jyly öndırıstık ǧimaratty jalǧa alu aqysynyŋ 75 paiyzy, 2-şı jyly 50 paiyzy, al, 3-şı jyly 25 paiyzy biudjet esebınen subsidiialanady. Oǧan qosa osy parkterde käsıporyn aşqan kompaniialarǧa jyldyq üstemaqysy 1 paiyzdyq jeŋıldetılgen nesie beremız, – dedı M.Äitenov.
Aita keteiık, jaŋadan aşylyp otyrǧan önerkäsıptık parkte 1 065 şarşy metr keŋselık, 3 583 şarşy metr öndırıstık ǧimarattar salynǧan. Jobanyŋ ekınşı kezeŋınde, iaǧni, 2023 jylǧa qarai taǧy 8 myŋ şarşy metr öndırıstık ǧimarattar ıske qosylady. Äzırge mūnda 8 şaǧyn käsıporyn jūmysyn bastady. Atap aitqanda, tūrmystyq himiia, onyŋ ışınde juu qūraldaryn şyǧaratyn seh, qūrylys industriiasyna arnalǧan türlı qospalar şyǧaratyn zauyt, gidrotaran öndıretın seh jäne özgelerı bar.
Mūnan keiın qala äkımı M.Äitenov «Oŋtüstık» arnaiy ekonomikalyq aimaǧynda bolyp, «Shymkent Qagazy» jauapkerşılıgı şekteulı serıktestıgınıŋ qaǧaz jäne karton būiymdar şyǧaratyn zauytynyŋ aşylu saltanatyna da qatysty.
Aidar QŪLJANOV, Foto Serık QOSAEV
