اتىراۋ وبلىسى اكىمىنىڭ ورىنباسارى باقىتگۇل حامەنوۆا قىزمەتىنەن بوساتىلمايدى. ءۇي قاماققا الىنعان شەنەۋنىكتىڭ ارىپتەستەرى قۇزىرلى ورىنداردان رەسمي قاۋلى كەلمەيىنشە، ونى جۇمىستان شىعارا المايمىز دەپ وتىر. بۇل تۋرالى كتك حابارلادى، دەپ مالىمدەيدى "ادىرنا" ۇلتتىق پورتالى.
- بۇگىن جۇمىستا جوق. رەسمي ورگانداردان، سوتتان ەشقانداي قاۋلى كەلگەن جوق. ەگەر سونداي رەسمي قۇجات كەلسە، اكىمدىك تاراپىنان شەشىم قابىلدانادى، - دەيدى اتىراۋ وبلىسى اكىمىنىڭ ءباسپاسوز حاتشىسى ەرجان قالىمباي.
وبلىس اكىمىنىڭ ورىنباسارى اباي ەسكەرتكىشىنە بولىنگەن 150 ميلليون تەڭگەنىڭ 4 جارىم ميلليونىن الماق بولدى دەگەن كۇدىكپەن وتكەن جۇمادا قاماۋعا الىنعان. ونىمەن قوسا اتىراۋ وبلىستىق مادەنيەت باسقارماسىنىڭ باسشىسى دا ۇستالعان. بىراق اقىلبەك رىسقاليەۆ ءوز كىناسىن مويىنداعانى ءۇشىن قاماۋعا الىنبادى. ال سوت باقىتگۇل حامەنوۆانىڭ وتباسى جاعدايىن ەسكەرە وتىرىپ ءۇي قاماققا جىبەردى.
قوس شەنەۋنىكتىڭ باسىنا بالە بولعان ەسكەرتكىش دايىن ەكەن. سالماعى بەس توننا بولاتىن مونۋمەنت 16 جەلتوقسان كۇنى اشىلادى دەپ جوسپارلانعان. الايدا جۇما كۇنگى جايسىز حاباردان سوڭ 27 جەلتوقسانعا شەگەرىلىپتى. بۇل جوبانىڭ اۆتورى 2019 جىلى كونكۋرس ارقىلى بەلگىلى بولعان. ءبىر اي بۇرىن عانا "بالقىتۋ" سەرىكتەستىگىمەن كەلىسىمشارت جاسالىپ، العاشقى 72 ميلليون تەڭگەسى يگەرىلىپ قويعان. ال قالعانىن كەلەر جىلعى بيۋدجەتكە جوسپارلاعان ەكەن.
- اباي قۇنانبايۇلىنا ەسكەرتكىش ورناتۋ ماسەلەسى 2018 جىلى اتىراۋ وبلىسى تاريح جانە مادەنيەت ەسكەرتكىشتەرىن قورعاۋ كوميسسياسىنىڭ وتىرىسىندا قارالدى. نۇر-سۇلتان قالاسىندا قولداۋ تاپتى. ءمۇسىننىڭ اۆتورى – نارىتوۆ، - دەيدى اتىراۋ وبلىسى تاريحي-مادەني مۇرانى زەرتتەۋ ورتالىعى باسشىسىنىڭ ورىنباسارى تولىباي دوستىباەۆ.
"ادىرنا" ۇلتتىق پورتالى
