Atyraý oblysy ákiminiń orynbasary Baqytgúl Hamenova qyzmetinen bosatylmaıdy. Úı qamaqqa alynǵan sheneýniktiń áriptesteri quzyrly oryndardan resmı qaýly kelmeıinshe, ony jumystan shyǵara almaımyz dep otyr. Bul týraly KTK habarlady, dep málimdeıdi "Adyrna" ulttyq portaly.
- Búgin jumysta joq. Resmı organdardan, sottan eshqandaı qaýly kelgen joq. Eger sondaı resmı qujat kelse, ákimdik tarapynan sheshim qabyldanady, - deıdi Atyraý oblysy ákiminiń baspasóz hatshysy Erjan Qalymbaı.
Oblys ákiminiń orynbasary Abaı eskertkishine bólingen 150 mıllıon teńgeniń 4 jarym mıllıonyn almaq boldy degen kúdikpen ótken jumada qamaýǵa alynǵan. Onymen qosa Atyraý oblystyq mádenıet basqarmasynyń basshysy da ustalǵan. Biraq Aqylbek Rysqalıev óz kinásin moıyndaǵany úshin qamaýǵa alynbady. Al sot Baqytgúl Hamenovanyń otbasy jaǵdaıyn eskere otyryp úı qamaqqa jiberdi.
Qos sheneýniktiń basyna bále bolǵan eskertkish daıyn eken. Salmaǵy bes tonna bolatyn monýment 16 jeltoqsan kúni ashylady dep josparlanǵan. Alaıda juma kúngi jaısyz habardan soń 27 jeltoqsanǵa shegerilipti. Bul jobanyń avtory 2019 jyly konkýrs arqyly belgili bolǵan. Bir aı buryn ǵana "Balqytý" seriktestigimen kelisimshart jasalyp, alǵashqy 72 mıllıon teńgesi ıgerilip qoıǵan. Al qalǵanyn keler jylǵy bıýdjetke josparlaǵan eken.
- Abaı Qunanbaıulyna eskertkish ornatý máselesi 2018 jyly Atyraý oblysy tarıh jáne mádenıet eskertkishterin qorǵaý komıssııasynyń otyrysynda qaraldy. Nur-Sultan qalasynda qoldaý tapty. Músinniń avtory – Narytov, - deıdi Atyraý oblysy tarıhı-mádenı murany zertteý ortalyǵy basshysynyń orynbasary Tolybaı Dostybaev.
"Adyrna" ulttyq portaly
