تاۋەلسىزدىگىمىزدىڭ 30 جىلدىعىنا وراي شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنا قاراستى «ايالى الاقان» مۇمكىندىگى شەكتەۋلى بالالاردى وڭالتۋ ورتالىعى اشىلدى.
Nur Otan پارتياسىنىڭ 2021-2025 جىلدارعا ارنالعان «وزگەرىستەر جولى: بارشاعا لايىقتى ءومىر!» سايلاۋالدى باعدارلاماسىندا بەلگىلەنگەن ناقتى ءىس-شارالاردى جۇزەگە اسىرۋ ماقساتىندا قولدانىسقا بەرىلگەن وڭالتۋ ورتالىعىنىڭ اشىلۋ راسىمىنە شىمكەنت قالالىق ءماسليحاتتىڭ حاتشىسى ب.نارىمبەتوۆ، Nur Otan پارتياسىنىڭ قالالىق فيليالى توراعاسىنىڭ ءبىرىنشى ورىنباسارى ج.بەكتاەۆا، اباي اۋدانىنىڭ اكىمى ب.پارمانوۆ، قالالىق ءماسليحات دەپۋتاتى ت.سۇلتانوۆا، Nur Otan پارتياسىنىڭ فيليالى جانىنداعى جۇمىسپەن قامتۋدى جانە حالىقتىڭ الەۋمەتتىك وسال توپتارىن قولداۋ جونىندەگى ايماقتىق قوعامدىق كەڭەس توراعاسى ب.كۋانىشبەكوۆ جانە ەرەكشە كۇتىمدى قاجەت ەتەتىن بالالاردىڭ اتا-انالارى قاتىستى.
«حالىققا الەۋمەتتىك قىزمەت كورسەتەتىن قالالىق اۋماقتىق ورتالىعى» مەكەمەسىنىڭ ىشىنەن اشىلعان ورتالىقتا تىرەك-قيمىل جانە جۇيكە جۇيەسىنىڭ دەرتىنە شالدىققان 18 جاسقا دەيىنگى بالالارعا تولىق ستاتسيونارلىق جاعدايدا الەۋمەتتىك، تۇرمىستىق، مەديتسينالىق، پسيحولوگيالىق، پەداگوگيكالىق، ەڭبەك، مادەني، ەكونوميكالىق، قۇقىقتىق قىزمەت تۇرلەرى كورسەتىلەدى. وسى ماقساتتا ەم-شارالىق، سپورتتىق جانە وزگە دە قىزمەت كورسەتەتىن بولمەلەرمەن جابدىقتالعان. بۇل جەردە ستاتسيونارلىق جاعدايدا 40-قا جۋىق بالاعا دەيىن قىزمەت كورسەتۋ مۇمكىندىگى بار. جالپى، قالالىق جۇمىسپەن قامتۋ جانە الەۋمەتتىك قورعاۋ باسقارماسىنا قاراستى 8 ارناۋلى الەۋمەتتىك ورتالىق قىزمەت جاساۋدا»،– دەيدى، اتالعان باسقارما باسشىسى بالمارجان ناربەكوۆا.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
