قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي، جەرگىلىكتى قامتۋدى دامىتۋ، تۇتىنۋشىلاردىڭ قۇقىعىن قورعاۋ ماسەلەلەرى قارالدى.
2021 جىلدىڭ 9 ايىندا جەرگىلىكتى قامتۋدىڭ ءوسۋ قارقىنى وتكەن جىلدىڭ سايكەس كەزەڭىمەن سالىستىرعاندا 6,4 %-دى قۇراعان. ياعني، 51,9 %-دان 58,3 %-عا ارتىپ وتىر. قاراپايىم زاتتار ەكونوميكاسىنىڭ 7 سالاسى بويىنشا (ماشينا جاساۋ، فارماتسەۆتيكا، جەڭىل، جيھاز، حيميا جانە تاماق ونەركاسىپتەرى) جەرگىلىكتى قامتۋدىڭ جوسپارلى كورسەتكىشتەرىنە قول جەتكىزىلدى.
قاراپايىم زاتتار ەكونوميكاسى باعدارلاماسىن ىسكە اسىرۋدا، جەرگىلىكتى قامتۋدىڭ ۇلەسىن قاداعالاۋ بويىنشا بارلىق وڭىردە ءتيىستى كوميسسيالار قۇرىلعان. «اتامەكەن» ۇكپ باسقارما توراعاسى ابىلاي مىرزاحمەتوۆ بۇل ورايدا الماتى، نۇر-سۇلتان، شىمكەنت قالالارىندا بەلسەندى جۇمىس جۇرگىزىلىپ جاتقانىن اتاپ ءوتتى.
قر پرەمەر-ءمينيسترى اكىمدىكتەرگە جەرگىلىكتى قامتۋدى باقىلاۋ جونىندەگى وڭىرلىك كوميسسيالاردىڭ جۇمىسىن كۇشەيتۋدى، ولاردىڭ قىزمەتىنە وڭىرلىك بيزنەس وكىلدەرىن بارىنشا تارتۋدى تاپسىردى.
شىمكەنت قالاسى اكىمدىگىنىڭ ءباسپاسوز قىزمەتى
