شىمكەنت قالالىق كلينيكالىق بالالار اۋرۋحاناسىندا العاش رەت سكوليوز اۋرۋىنا شالدىققان ناۋقاسقا كۇردەلى وتا جاسالدى. تىڭ ادىسپەن جاسالعان وپەراتسيا نۇر-سۇلتان قالاسىنان كەلگەن بىلىكتى تراۆماتولوگ دارىگەردىڭ جەتەكشىلىگىمەن ءوتتى.
دارىگەرلەر ومىرتقاسى قيسايعان 10 جاسار قىز بالاسىنا جەتى ساعاتقا جۋىق وتا جاسادى. وپەراتسياعا اۋرۋحانانىڭ تراۆماتولوگ ورتوپەدى تۇردىقۇلوۆ باعجان قاتىستى. وتا كەزىندە حيرۋرگتار ناۋقاستىڭ ومىرتقاسىن حيرۋرگيالىق جولمەن تۇزەتىپ بەردى. ناقتىراق ايتقاندا، قيسايعان سۇيەگىن تۇزەتىپ، دەنەسىن تىك ۇستاۋ ءۇشىن ارنايى تەمىر قۇرىلعىنى ارقا تۇسىنا ورناتىپ بەرگەن. ون جىلدىق تاجىريبەسى بار ەلوردالىق ماماندار مۇنداي وتانىڭ بۇل جولى دا كۇردەلى وتكەنىن ايتادى.
«وڭتۇستىك وڭىرىندە حالىق سانى كوپ بولعاندىقتان، سكوليزگە شالدىققان ناۋقاس بالالار سانى دا بۇل ايماقتا كوپ ەكەنىن ايتۋعا بولادى. سوندىقتان مۇنداي جوعارى مامانداندىرىلعان وتانى ايماقتارعا كەلىپ، جەرگىلىكتى ماماندارمەن تاجىريبە بولىسكەنىمىز دۇرىس. بۇل جولى ءبىز قالالىق كلينيكالىق بالالار اۋرۋحاناسىنا كەلىپ، وسىنداي كۇردەلى وتا جاسادىق. وپەراتسيا ءساتتى ءوتتى. وتا جاساۋ بارىسىندا بۇل اۋرۋحانانىڭ جوعارى مامانداندىرىلعان حيرۋرگيالىق ەم جاساۋعا مۇمكىندىگى بار ەكەنىن بايقادىق. بۇل ءۇشىن جەرگىلىكتى مامانداردىڭ بىلىكتىلىگى جەتەدى»، - دەيدى نۇر-سۇلتان قالاسىنداعى «انا مەن بالا» ۇلتتىق عىلىمي ورتالىعى ورتوپەديا ءبولىمىنىڭ جەتەكشىسى بولات ناعىمانوۆ.
بىلىكتى دارىگەردىڭ سوزىنشە، وتادان كەيىن ناۋقاستىڭ جاعدايى بۇرىنعىدان جاقسارا تۇسەدى. ياعني، ومىرتقانىڭ قيسايۋىنان پايدا بولعان بۇكىرلىگى جويىلادى جانە بويىنىڭ ۇزىندىعى قالپىنا تۇسەدى.
ايتا كەتەيىك، مۇنداي وتا نۇر-سۇلتان قالاسىندا 2010 جىلدان بەرى جاسالىپ كەلەدى. جىلىنا ورتاشا ەسەپپەن سكوليوز اۋرۋىنا شالدىقان 150-گە جۋىق بالاعا كۇردەلى وپەراتسيا جاسالادى.
نۇر-سۇلتاندىق دارىگەرلەردىڭ قاتىسۋىمەن وتكەن وپەراتسياعا جەرگىلىكتى دارىگەرلەر قاتىسىپ، ارىپتەستەرىمەن تاجىريبە الماستى. جوسپار بويىنشا قالالىق كلينيكالىق اۋرۋحانا ماماندارى تاعى دا كۇردەلى تراۆماتولوگيالىق وتا جاساۋ بارىسىن جەتىك مەڭگەرىپ، جەرگىلىكتى دەڭگەيدە دامىتۋدا قولعا الماق.
شىمكەنت قالاسى اكىمدىگىنىڭ ءباسپاسوز قىزمەتى
