قالانىڭ شەتىندەگى «اقجار» جانە «اقتاس» شاعىناۋدانىندا ۆاكتسينا ەگۋ جۇمىستارى قارقىن الدى. اقتاستاعى №61 مەكتەپتە قازىر 300-دەن اسا وقۋشى ءبىلىم الادى. ءبىلىم ۇياسىنداعى وقۋشىلارعا پروفيلاكتيكالىق جۇمىستاردى دەر كەزىندە جۇرگىزۋ ءۇشىن مۇندا ەگۋ بەكەتىنىڭ جۇمىسى ۇيىمداستىرىلعان. №11 ەمحانا ماماندارى بۇگىن مەديتسينالىق كابينەتتە العاش رەت وقۋشىلارعا Pfizer پرەپاراتىن سالدى.
«پەرزەنتىمنىڭ قاۋىپسىزدىگى ءۇشىن مەن بۇگىن مەكتەپكە ارنايى كەلىپ، بالاما ۆاكتسينا سالدىردىم. ۆاكتسيناتسيالاۋ كەزىندە ۇلىمنىڭ قاسىندا بولدىم. بالام 9 سىنىپتا وقيدى»، - دەيدى جاننۇر بەگماعانبەتوۆا.
اقجارداعى مەديتسينالىق ۇيىمدا دا بۇگىن №11 ەمحانا ماماندارى بالا ەمىزەتىن انالار مەن جۇكتى ايەلدەرگە ەكپە سالىپ بەردى. ءوز ەركىمەن ەكپە الۋعا كەلگەن انالاردى دارىگەرلەر الدىمەن مەديتسينالىق تەكسەرۋدەن وتكىزىپ، ۆاكتسينانى ەنگىزۋ الگوريتمىن ءتۇسىندىرىپ بەردى.
قالالىق №11 ەمحانانىڭ باس دارىگەرى قانات تۋمانوۆتىڭ ايتۋىنشا، ەمدەۋ مەكەمەسى اۋماعىندا 10 مەكتەپ بار. ءبىلىم ۇيالارىنىڭ بارلىعىندا ەگۋ بەكەتتەرى جۇمىس ىستەۋدە.
«№11 ەمحانادا تىركەۋدە 12-18 جاس ارالىعىنداعى 4602 ءجاسوسپىرىم بار. سونداي-اق، بالا ەمىزەتىن 556 جانە 344 جۇكتى ايەل بار. بۇگىن ءبىز جوسپار بويىنشا 12 ازاماتقا Pfizer پرەپاراتىن سالىپ بەردىك. ۆاكتسينا الۋى ءتيىس توپتاعى پاتسيەنتتەرگە اعارتۋ جۇمىستارى تولىعىمەن جۇرگىزىلدى. دەنساۋلىق جاعدايى مەن پاتسيەنتتىڭ كەلىسىمى بولسا، مەديتسينا ماماندارى ۆاكتسينا سالىپ بەرۋگە دايىن»، - دەيدى ق.تۋمانوۆ.
ايتا كەتەيىك، 15 قاراشادان باستاپ شىمكەنتتە Pfizer پرەپاراتىمەن ەگۋ جۇمىستارى جۇرگىزىلۋدە. ەكى كۇن ىشىندە قالادا 173 ادام Pfizer ۆاكتسيناسىن سالدىرعان. ۆاكتسينا العانداردىڭ ىشىندە 133-ءى ءجاسوسپىرىم، 28-ءى جۇكتى ايەل جانە 12-ءسى بالا ەمىزەتىن انا. دارىگەرلەردىڭ سوزىنشە، ەكپە العانداردىڭ اراسىندا كەرى رەاكتسيا بولعان جاعداي تىركەلمەدى.
