شىمكەنتتە 24 قاراشا مەن 8 جەلتوقسان ارالىعىندا الەۋمەتتىك جەلىلەردە جاريالاناتىن جۇمىستارعا بايقاۋ جاريالاندى. بۇل تۋرالى قالالىق جاستار رەسۋرستىق ورتالىعىندا وتكەن ءباسپاسوز جيىنىندا «بايتەرەك» جاستار ۇيىمىنىڭ جوبا ۇيلەستىرۋشىسى سابيرا بايزاحوۆا مالىمدەدى. ەل تاۋەلسىزدىگىنىڭ 30 جىلدىعىنا وراي ۇيىمداستىرىلىپ وتىرعان بايقاۋعا 14 پەن 45 جاستاعى قالا تۇرعىندارى قاتىسا الادى. جالپى سايىستىڭ جۇلدە قورى – 1 ملن 500 مىڭ تەڭگە.
جاستار اراسىنداعى پاتريوتتىق سەزىمدى كوتەرۋ جانە مەديامادەنيەتكە ۇيرەتۋ ماقساتىندا وتكىزىلگەلى وتىرعان بايقاۋ جۇمىستارى ءۇش نوميناتسيا بويىنشا ساراپقا سالىنادى.
– بايقاۋ قاتىسۋشىلارى 100 مىڭ وقىرماننان كەم بولمايتىن الەۋمەتتىك جەلىلەردە #تاۋەلسىزدىككە30جىل حەشتەگىن پايدالانا وتىرىپ جازبا، ۆاين، روليكتەرىن جاريالايدى. سىلتەمەسىن ۇيىمداستىرۋشىلار، ياعني بىزگە جولداۋلارىنا بولادى. 9 جەلتوقسان كوميسسيا وتىرىسى وتەدى. ءار سالادان جينالعان ساپارشىلار ۇزدىك جۇمىستاردى انىقتاۋعا كومەكتەسەدى. «ۇزدىك جازبا»، «ۇزدىك ۆاين»، «ۇزدىك روليك» اتالىمدارى بويىنشا باس جۇلدە مەن 1,2,3 ورىن يەگەرلەرىنە باعالى سىيلىقتار تابىستالادى، - دەدى سابيرا مۇراتقىزى.
ءباسپاسوز جيىنىندا ءار اتالىمعا جاۋاپتى سالا ماماندارى دا قاتىسىپ، جۇمىستارعا قويىلاتىن تالاپتارعا توقتالدى. جۋرناليست، قالالىق «رۋحاني جاڭعىرۋ» جوبالىق كەڭسەسىنىڭ جەتەكشىسى زاۋرە ورالباەۆا الەۋمەتتىك جەلىلەردە وقىرماندارعا ارنالعان كونتەنت جازۋدا مەديامادەنيەتتىلىك پەن كيبەربۋللينگ ماسەلەسىنە نازار اۋدارۋ كەرەك ەكەنىن اتاپ ءوتتى. ال بەلگىلى اكتيرسا، بلوگەر-ۆاينەر اقەركە اسقار ۆاين تۇسىرۋدە تاربيەلىك ءمانى بار تاقىرىپتاردى تاڭداڭداۋعا شاقىردى.
بريفينگ بارىسىندا ءسوز العان «Jaidarman Production» ستۋدياسىنىڭ ۆيدەووپەراتورى مۇحيت قارساقباەۆ ۆيدەكونتەنت جۇرگىزۋدە كامەرا، فوتواپپارات سىندى قىمبات تەحنيكالارمەن قاتار گادجەتتەردىڭ كومەگىنە جۇگىنۋ ارقىلى ساپالى دۇنيەلەر جاساۋعا بولاتىنىن ايتتى. سونداي-اق، ۇمىتكەرلەر سمارتفوندارعا ارنالعان تەگىن مونتاج باعدارلامالارىمەن دە جۇمىس ىستەۋ شەبەرلىكتەرىن كورسەتە الاتىندارىن جەتكىزدى.
ازامات جاپپار،
فوتو: سەرىك قوساەۆ
