بۇگىن شىمكەنت قالاسىنداعى جاستار رەسۋرستىق ورتالىعىندا وليمپيادا ويىندارى مەن الەم چەمپيوناتتارىندا ەل نامىسىن قورعاپ جۇرگەن بەلگىلى سپورتشىلاردىڭ جاستارمەن كەزدەسۋى ءوتتى. تاۋەلسىزدىكتىڭ 30 جىلىنا وراي ۇيىمداستىرىلعان «جۇلدىزدى 30 كۇن» اتتى شارانىڭ اياسىندا وتكەن كەزدەسۋگە كاراتە شەبەرى، توكيو وليمپياداسىنىڭ قولا جۇلدەگەرى دارحان ءاسادىلوۆ، پاۋەرليفتينگتەن 7 دۇركىن الەم چەمپيونى كسەنيا حان جانە كيكبوكسينگتەن 2 دۇركىن الەم چەمپيونى فازليددين سافاروۆ قاتىستى.
–تاۋەلسىزدىكتىڭ 30 جىلى قارساڭىندا جاستارمەن كەزدەسىپ وتىرعانىما قۋانىشتىمىن. بۇل شىن مانىندە وتە ماڭىزدى مەرەكە. سەبەبى، ادام بالاسى ءۇشىن ازاتتىقتان ارتىق، ەركىندىك پەن تەڭدىكتەن قىمبات ەشتەڭە جوق. مۇنى، اسىرەسە، حالىقارالىق جارىستارعا بارعان كەزدە ەرەكشە سەزىندىم. ارقاڭدا بىرلىگى بەكەم، قۋاتتى مەملەكەتىڭنىڭ بار ەكەنىن سەزىنۋ سپورتشىنىڭ ءوز-وزىنە دەگەن سەنىمىن ارتىرىپ، رۋحىن كۇشەيتە تۇسەدى. سوندىقتان وسىنداعى بارشا جاستاردى ەلگە ادال قىزمەت ەتۋگە شاقىرامىن. سىزدەر مەيلى سپورتشى بولارسىز نەمەسە باسقا سالادا ەڭبەك ەتەرسىز، ءوز ءىسىڭىزدى ادال اتقارۋعا، ادامدارعا پايداڭىزدى تيگىزۋگە ۇمتىلساڭىز، مەنىڭشە، ەلگە قىزمەتتىڭ ۇلكەنى سول، – دەدى دارحان ءاسادىلوۆ.
كەزدەسۋ بارىسىندا جاستار سپورتشىلاردان وليمپيادادان العان اسەرى، جەتىستىككە جەتۋدىڭ سىرى مەن ءار سپورت ءتۇرىنىڭ ەرەكشەلىگى، بولاشاققا قۇرعان جوسپارلارى تۋرالى سۇرادى. ءوز كەزەگىندە سپورتشىلار جاستاردىڭ سۇراقتارىنا جاۋاپ بەرىپ، ءىنى-قارىنداستارىنا اقىل-كەڭەستەرىن ايتتى.
ا.سايلاۋۇلى.
