Búgin Shymkent qalasyndaǵy Jastar resýrstyq ortalyǵynda Olımpıada oıyndary men álem chempıonattarynda el namysyn qorǵap júrgen belgili sportshylardyń jastarmen kezdesýi ótti. Táýelsizdiktiń 30 jylyna oraı uıymdastyrylǵan «Juldyzdy 30 kún» atty sharanyń aıasynda ótken kezdesýge karate sheberi, Tokıo Olımpıadasynyń qola júldegeri Darhan Asadilov, paýerlıftıngten 7 dúrkin álem chempıony Ksenııa Han jáne kıkboksıngten 2 dúrkin álem chempıony Fazlıddın Safarov qatysty.
–Táýelsizdiktiń 30 jyly qarsańynda jastarmen kezdesip otyrǵanyma qýanyshtymyn. Bul shyn máninde óte mańyzdy mereke. Sebebi, adam balasy úshin azattyqtan artyq, erkindik pen teńdikten qymbat eshteńe joq. Muny, ásirese, halyqaralyq jarystarǵa barǵan kezde erekshe sezindim. Arqańda birligi bekem, qýatty memleketińniń bar ekenin seziný sportshynyń óz-ózine degen senimin artyryp, rýhyn kúsheıte túsedi. Sondyqtan osyndaǵy barsha jastardy elge adal qyzmet etýge shaqyramyn. Sizder meıli sportshy bolarsyz nemese basqa salada eńbek etersiz, óz isińizdi adal atqarýǵa, adamdarǵa paıdańyzdy tıgizýge umtylsańyz, menińshe, elge qyzmettiń úlkeni sol, – dedi Darhan Asadilov.
Kezdesý barysynda jastar sportshylardan Olımpıadadan alǵan áseri, jetistikke jetýdiń syry men ár sport túriniń ereksheligi, bolashaqqa qurǵan josparlary týraly surady. Óz kezeginde sportshylar jastardyń suraqtaryna jaýap berip, ini-qaryndastaryna aqyl-keńesterin aıtty.
A.SAILAÝULY.
