شىمكەنتتەگى وقۋشىلار سارايىندا «مەنىڭ ءتىلىم» اتتى ونەر سايىسى ءوتتى. تاۋەلسىزدىكتىڭ 30 جىلدىعىنا وراي «30 جىلدىققا – 30 جۇلدىزدى كۇن» اتتى ءىس-شارالار شەرۋى اياسىندا ۇيىمداستىرعان بايقاۋدا ەتنوس وكىلدەرى ونەرلەرىن ورتاعا سالدى.
قالالىق تىلدەردى وقىتۋ جانە ادىستەمەلىك ورتالىعىنىڭ ۇيىمداستىرۋىمەن وتكەن ونەر سايىسىندا ءتۇرلى سالادا قىزمەت ەتەتىن، جوعارى جانە ارناۋلى ورتا وقۋ ورىندارىندا ءبىلىم الاتىن 11 ەتنوس وكىلى باق سىنادى.
قاتىسۋشىلار العاشقى كەزەڭدە سالەمدەسىپ، وزدەرىن تانىستىرسا، سايىستىڭ ەكىنشى بولىمىندە ونەرلەرىن پاش ەتتى. «ماقال – ءسوزدىڭ مايەگى» ايدارىندا قازاق ءتىلىن قانشالىقتى مەڭگەرگەندەرىن دالەلدەدى. ولار ەكراندا كورسەتىلگەن ماقالدىڭ جالعاسىن جاتقا ايتىپ، ءوزارا مىقتىنى انىقتادى. مەملەكەتتىك تىلدە قويىلعان سۇراقتارعا مۇدىرمەي جاۋاپ بەردى. قازاق تىلىندە وزدەرىنىڭ ويلارىن ەركىن جەتكىزىپ، جينالعان قاۋىمنىڭ تاڭدانىسىن تۋدىردى. سونداي-اق، ۇلتتىق اسپاپتا ويناۋ شەبەرلىگىن كورسەتتى.
– بايقاۋدىڭ نەگىزگى ماقساتى – قالامىزدا تۇراتىن وزگە ۇلت وكىلدەرى اراسىندا مەملەكەتتىك ءتىلدى ءبىلۋ دەڭگەيىن انىقتاۋ جانە ولاردى ىنتالاندىرۋ، ءارى قاراي سول تىلگە دەگەن ناسيحاتتى، ءپاتريوتيزمدى قالىپتاستىرۋ، ۇلتارالىق ىنتىماقتاستىقتى نىعايتۋدى كوزدەيدى، - دەيدى ورتالىق ديرەكتورى داۋرەن اۋەلحانۇلى.
قازاق ءتىلىنىڭ مەرەيىن اسىرۋعا باعىتتالعان بايقاۋدا «ايعاق» تەلەارناسىنىڭ ديرەكتورى مۇحتار سەرىكباەۆ، «قىزمەت» گازەتىنىڭ باس رەداكتورى بەيسەنكۇل نارىمبەتوۆا، قالالىق «قوعامدىق كەلىسىم» مەكەمەسىنىڭ ءبولىم باسشىسى ۇلجان ايتۋباەۆالار تورەلىك ەتتى. كورەرمەن كوزايىمىنا اينالعان سايىس جەڭىمپازدارى بايقاۋ قورىتىندىسى بويىنشا العىس حات جانە باعالى سىيلىقتارمەن ماراپاتتالدى.
ازامات جاپپار
