Shymkenttegi oqýshylar saraıynda «Meniń tilim» atty óner saıysy ótti. Táýelsizdiktiń 30 jyldyǵyna oraı «30 jyldyqqa – 30 juldyzdy kún» atty is-sharalar sherýi aıasynda uıymdastyrǵan baıqaýda etnos ókilderi ónerlerin ortaǵa saldy.
Qalalyq tilderdi oqytý jáne ádistemelik ortalyǵynyń uıymdastyrýymen ótken óner saıysynda túrli salada qyzmet etetin, joǵary jáne arnaýly orta oqý oryndarynda bilim alatyn 11 etnos ókili baq synady.
Qatysýshylar alǵashqy kezeńde sálemdesip, ózderin tanystyrsa, saıystyń ekinshi bóliminde ónerlerin pash etti. «Maqal – sózdiń máıegi» aıdarynda qazaq tilin qanshalyqty meńgergenderin dáleldedi. Olar ekranda kórsetilgen maqaldyń jalǵasyn jatqa aıtyp, ózara myqtyny anyqtady. Memlekettik tilde qoıylǵan suraqtarǵa múdirmeı jaýap berdi. Qazaq tilinde ózderiniń oılaryn erkin jetkizip, jınalǵan qaýymnyń tańdanysyn týdyrdy. Sondaı-aq, ulttyq aspapta oınaý sheberligin kórsetti.
– Baıqaýdyń negizgi maqsaty – qalamyzda turatyn ózge ult ókilderi arasynda memlekettik tildi bilý deńgeıin anyqtaý jáne olardy yntalandyrý, ári qaraı sol tilge degen nasıhatty, patrıotızmdi qalyptastyrý, ultaralyq yntymaqtastyqty nyǵaıtýdy kózdeıdi, - deıdi ortalyq dırektory Dáýren Áýelhanuly.
Qazaq tiliniń mereıin asyrýǵa baǵyttalǵan baıqaýda «Aıǵaq» telearnasynyń dırektory Muhtar Serikbaev, «Qyzmet» gazetiniń bas redaktory Beısenkúl Narymbetova, qalalyq «Qoǵamdyq kelisim» mekemesiniń bólim basshysy Uljan Aıtýbaevalar tórelik etti. Kórermen kózaıymyna aınalǵan saıys jeńimpazdary baıqaý qorytyndysy boıynsha alǵys hat jáne baǵaly syılyqtarmen marapattaldy.
Azamat JAPPAR
