جولايرىق تولىعىمەن اشىلدى

196

بۇگىن د.قوناەۆ داڭعىلى مەن ت.رىسقۇلوۆ كوشەسىنىڭ قيىلىسىنداعى جولايرىق تولىعىمەن اشىلدى. بۇعان دەيىن جولايرىقتىڭ اشىق توننەلى مەن ت.رىسقۇلوۆ كوشەسىندەگى اينالما جولدىڭ ءبىر بولىگى پايدالانۋعا بەرىلگەن ەدى. ال، بۇگىن جولدىڭ ەكىنشى جاعى دا اشىلىپ، اۆتوكولىكتەر بارلىق باعىتتا جۇرە باستادى.

جولايرىقتىڭ اشىلۋىنا قاتىسقان شىمكەنت قالاسىنىڭ اكىمى م.ايتەنوۆ نىساننىڭ اينالاسىن كوگالداندىرۋ جۇمىستارىمەن جانە جاياۋ جۇرگىنشىلەرگە ارنالعان جەراستى وتكەلىنىڭ قۇرىلىسىمەن تانىستى. جوسپارعا سايكەس، بۇل ماڭعا 320 ءتۇپ تالشىن اعاشى وتىرعىزىلادى.

–قالا تۇرعىندارىن وسىنداي ماڭىزدى نىساننىڭ اشىلۋىمەن قۇتتىقتايمىن. بۇرىن وسى قيىلىستان تاۋلىگىنە 30 مىڭ اۆتوكولىك وتكەن بولسا، جولايرىقتىڭ ارقاسىندا بۇل كورسەتكىش 90 مىڭعا جەتەدى، – دەگەن مۇرات دۇيسەنبەكۇلى ەندىگى كەزەكتە بايدىبەك بي مەن ارعىنبەكوۆ كوشەلەرىنىڭ قيىلىسىنداعى جولايرىقتىڭ قۇرىلىسى باستالاتىنىن جەتكىزدى.

شاھار باسشىسىنىڭ ايتۋىنشا، جاڭا نىساننىڭ قۇرىلىسىن جەلتوقسان ايىندا باستاۋ جوسپارلانعان. الايدا، تاۋەلسىزدىك كۇنى مەن جاڭا جىل مەرەكەلەرىنە بايلانىستى بۇل جۇمىس 2022 جىلدىڭ 5 قاڭتارىنا دەيىن شەگەرىلىپتى.

ايتا كەتەيىك، بۇل – ءۇش دەڭگەيدەن، اتاپ ايتقاندا، ەستاكادا، توننەل جانە جەر ءۇستى دەڭگەيلەرىنەن تۇراتىن كۇردەلى قۇرىلىس نىسانى. مۇنداي جولايرىق شىمكەنتتە العاش رەت سالىنباق. 2022 جىلدىڭ 5 قاڭتارىنان 1 تامىزعا دەيىن تەك ارعىنبەكوۆ كوشەسى جابىلادى. بۇل ۋاقىتتا بايدىبەك بي كوشەسىندە كولىك قوزعالىسى شەكتەلمەيدى. 2022 جىلعى تامىز-قازان ايلارىندا قوزعالىس بارلىق باعىتتار بويىنشا توقتاتىلادى.

كەلەر جىلى 1 قاراشادا ارعىنبەكوۆ كوشەسىندە تولىعىمەن، ال، بايدىبەك بي كوشەسىندە 80 پايىزعا كولىك قوزعالىسىنا رۇقسات بەرىلەدى. نىسان قۇرىلىسى 2023 جىلعى ناۋرىزدا اياقتالادى دەپ كۇتىلۋدە.

–ماگيسترالدى جولداردىڭ جابىلۋى تۇرعىندارعا ۋاقىتشا قولايسىزدىق تۋعىزاتىنىن تۇسىنەمىز. سول سەبەپتى مەردىگەر كومپانيادان 3 جىلعا جوسپارلانعان قۇرىلىستى 1 جىلدان استام ۋاقىتتا اياقتاۋدى تالاپ ەتىپ وتىرمىز. ەگەر ءبىز بۇل جۇمىستاردى كەيىنگە قالدىرا بەرسەك، كولىك كەپتەلىسىنە قاتىستى پروبلەما جىلدان جىلعا ۋشىعا تۇسەدى. سوندىقتان تۇرعىنداردى تۇسىنىستىكپەن قاراۋعا شاقىرامىن، – دەدى م.ايتەنوۆ.

قالا اكىمىنىڭ ايتۋىنشا، شاھاردىڭ باس جوسپارىندا وسىنداي 5 جولايرىق سالۋ قاراستىرىلعان. بىراق، سونىڭ وزىندە كەپتەلىس ماسەلەسى تولىعىمەن شەشىلەدى دەپ ايتۋ قيىن. سول سەبەپتى اكىم بولاشاقتا قالادا بالاما ترانسپورت جەلىسىن قۇرۋ قاجەتتىگىن دە اتاپ ءوتتى.

ايدار قۇلجانوۆ.
فوتو سەرىك قوساەۆ.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket