Búgin D.Qonaev dańǵyly men T.Rysqulov kóshesiniń qıylysyndaǵy jolaıryq tolyǵymen ashyldy. Buǵan deıin jolaıryqtyń ashyq tonneli men T.Rysqulov kóshesindegi aınalma joldyń bir bóligi paıdalanýǵa berilgen edi. Al, búgin joldyń ekinshi jaǵy da ashylyp, avtokólikter barlyq baǵytta júre bastady.
Jolaıryqtyń ashylýyna qatysqan Shymkent qalasynyń ákimi M.Áıtenov nysannyń aınalasyn kógaldandyrý jumystarymen jáne jaıaý júrginshilerge arnalǵan jerasty ótkeliniń qurylysymen tanysty. Josparǵa sáıkes, bul mańǵa 320 túp talshyn aǵashy otyrǵyzylady.
–Qala turǵyndaryn osyndaı mańyzdy nysannyń ashylýymen quttyqtaımyn. Buryn osy qıylystan táýligine 30 myń avtokólik ótken bolsa, jolaıryqtyń arqasynda bul kórsetkish 90 myńǵa jetedi, – degen Murat Dúısenbekuly endigi kezekte Báıdibek bı men Arǵynbekov kósheleriniń qıylysyndaǵy jolaıryqtyń qurylysy bastalatynyn jetkizdi.
Shahar basshysynyń aıtýynsha, jańa nysannyń qurylysyn jeltoqsan aıynda bastaý josparlanǵan. Alaıda, Táýelsizdik kúni men jańa jyl merekelerine baılanysty bul jumys 2022 jyldyń 5 qańtaryna deıin shegerilipti.
Aıta keteıik, bul – úsh deńgeıden, atap aıtqanda, estakada, tonnel jáne jer ústi deńgeılerinen turatyn kúrdeli qurylys nysany. Mundaı jolaıryq Shymkentte alǵash ret salynbaq. 2022 jyldyń 5 qańtarynan 1 tamyzǵa deıin tek Arǵynbekov kóshesi jabylady. Bul ýaqytta Báıdibek bı kóshesinde kólik qozǵalysy shektelmeıdi. 2022 jylǵy tamyz-qazan aılarynda qozǵalys barlyq baǵyttar boıynsha toqtatylady.
Keler jyly 1 qarashada Arǵynbekov kóshesinde tolyǵymen, al, Báıdibek bı kóshesinde 80 paıyzǵa kólik qozǵalysyna ruqsat beriledi. Nysan qurylysy 2023 jylǵy naýryzda aıaqtalady dep kútilýde.
–Magıstraldy joldardyń jabylýy turǵyndarǵa ýaqytsha qolaısyzdyq týǵyzatynyn túsinemiz. Sol sebepti merdiger kompanııadan 3 jylǵa josparlanǵan qurylysty 1 jyldan astam ýaqytta aıaqtaýdy talap etip otyrmyz. Eger biz bul jumystardy keıinge qaldyra bersek, kólik keptelisine qatysty problema jyldan jylǵa ýshyǵa túsedi. Sondyqtan turǵyndardy túsinistikpen qaraýǵa shaqyramyn, – dedi M.Áıtenov.
Qala ákiminiń aıtýynsha, shahardyń Bas josparynda osyndaı 5 jolaıryq salý qarastyrylǵan. Biraq, sonyń ózinde keptelis máselesi tolyǵymen sheshiledi dep aıtý qıyn. Sol sebepti ákim bolashaqta qalada balama transport jelisin qurý qajettigin de atap ótti.
Aıdar QULJANOV.
Foto Serik QOSAEV.
