ءۇشىنشى مەگاپوليستە قر تاۋەلسىزدىگىنىڭ 30 جىلدىعىنا ارنالعان ءىس-شارالار ايلىعى باستالدى. بۇل تۋرالى بۇگىن قالا اكىمدىگىنىڭ اقپاراتتىق-كوممۋنيكاتسيا ورتالىعىندا وتكەن ءباسپاسوز بريفينگىندە شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان مالىمدەدى.
– ەل تاۋەلسىزدىگىنىڭ 30 جىلدىعىنا ارنالعان ءىس-شارالار جىلدىڭ باسىنان باستالدى. ءار اي بەلگىلى ءبىر سالاعا ارنالدى. ەندى بۇگىننەن باستاپ "جۇلدىزدى 30 كۇن" جوباسى باستالىپ، 17 جەلتوقسانعا دەيىن جالعاسادى. قالا اكىمى مۇرات دۇيسەنبەكۇلى بەكىتكەن جۇمىس جوسپارىنا ساي وتەتىن جوبا اياسىندا 107 تارماقتان تۇراتىن ءىس-شارا ۇيىمداستىرىلادى دەپ كۇتىلۋدە. 17 جەلتوقسانعا دەيىنگى ءار كۇنگە جەكە اتاۋ بەرىلگەن. مىسالى، بۇگىن – "ستۋدەنتتەر كۇنى". سوعان ساي جاستارعا قاتىستى ءىس-شارالار وتۋدە، – دەدى شىڭعىس جۇمابەكۇلى.
سپيكەردىڭ ايتۋىنشا، جوبا 6 باعىتتى قامتيدى. ولار – ۇلتتىق قۇندىلىقتاردى دامىتۋ; ءبىلىمدى جاستاردى قولداۋ; مادەنيەت سالاسىن دامىتۋ; كاسىپكەرلىك، تۋريزم جانە تسيفرلاندىرۋ; ازاماتتاردى الەۋمەتتىك قولداۋ; مەرەكەگە وراي اشىلاتىن ءتۇرلى نىساندار.
وسى باعىتتاردىڭ ارقايسىسى بويىنشا وننان استام ءىس-شارا ۇيىمداستىرىلادى. شىڭعىس جۇمابەكۇلى ءىس-شارالار قالاداعى ەپيدەميولوگيالىق احۋالعا قاراي، بارلىق تالاپتى ساقتاي وتىرىپ وتكىزىلەتىنىن مالىمدەدى.
نۋرلان بەكتاەۆ
فوتو: سەرىك قوساەۆ
