الماتىدا «التىن بۇلاق-2» تۇرعىن ءۇي كەشەنىندەگى پاتەرلەر ورتەنىپ جاتىر. 120-دان استام ادام ەۆاكۋاتسيالاندى، دەپ حابارلايدى قازاقپارات.
الماتى قالاسىنىڭ توتەنشە جاعدايلار دەپارتامەنتىنىڭ كۇشتەرى مەن تەحنيكاسى شاقىرتۋ بويىنشا 11 جەلتوقساندا ساعات 23:58-دە المالى اۋدانى، برۋسيلوۆ كوشەسىندەگى 167 ۇيدەگى ءورتتى سوندىرۋگە اتتانعانىن ءمالىم ەتتى. ولار كەلگەن ساتتە، ياعني ساعات 00:08-دە «التىن بۇلاق-2» تۇرعىن ءۇي كەشەنىنىڭ 6-7, سونداي اق 17-18-ءشى قاباتتارى جانىپ جاتقان.
«وقيعا ورنىندا جەدەل شتاب قۇرىلدى. گاز جانە تۇتىننەن قورعاۋ قىزمەتىنىڭ بولىمشەلەرى قازىر 120-دان استام ادامدى ەۆاكۋاتسيالادى، 20 ادامدى قۇتقاردى، گيدرانتتارعا تسيستەرنالار ورناتتى. باسپالداق الاڭدارىنداعى ءتۇتىندى ازايتۋعا ونى تارتاتىن ءورت ءسوندىرۋ كولىكتەرى جۇمىلدىرىلدى»، - دەپ حابارلادى الماتى قالاسى توتەنشە جاعدايلار دەپارتامەنتى.
جالىن شارپىعان الاڭعا 70-تەن استام قىزمەتكەر مەن 18 تەحنيكا جۇمىلدىرىلعان. ەۆاكۋاتسيا ءجۇرىپ جاتىر. سول ماڭداعى جەكە كولىكتەردىڭ كوپتىگى ءورت ءسوندىرۋ تەحنيكاسىنا كەدەرگى بولعانىنا قاراماستان، ءورت ءسوندىرۋ ساتىلارى ىسكە قوسىلدى.
