2026 جىلى قازاقستاننىڭ اۋە كومپانيالارى توعىز جاڭا ۇشاق ساتىپ الماق. بۇل تۋرالى كولىك مينيسترلىگى ازاماتتىق اۆياتسيا كوميتەتىنىڭ توراعاسى سالتانات تومپيەۆا ايتتى، دەپ حابارلايدى «ادىرنا» ءتىلشىسى.
«جىل سوڭىنا دەيىن اۋە كومپانيالارى 9 جاڭا اۋە كەمەسىن ساتىپ الۋدى جوسپارلاپ وتىر. بۇل اۋە پاركىن شامامەن 118 بىرلىككە دەيىن ۇلعايتىپ، اۋە تاسىمالدارىنىڭ وتكىزۋ قابىلەتىن ارتتىرۋعا مۇمكىندىك بەرەدى. وڭىرلەردىڭ كولىك قولجەتىمدىلىگىن قامتاماسىز ەتۋ جانە ءتۋريزمدى دامىتۋ ماقساتىندا الەۋمەتتىك ماڭىزى بار 23 اۋە باعىتى بويىنشا سۋبسيديالاۋ باعدارلاماسى جالعاسىن تابادى»،-دەدى ول.
سونىمەن قاتار حالىقارالىق اۋە قاتىناسىن دامىتۋ جۇمىستارى جالعاسادى. حالىقارالىق جاڭا اۋە باعىتتارىن اشۋ جانە بۇرىن توقتاتىلعان رەيستەردى جانداندىرۋ، سونداي-اق قولدانىستاعى باعىتتار بويىنشا رەيستەر جيىلىگىن ارتتىرۋ جوسپارلانىپ وتىر.
باعىتتار جەلىسىن ورتالىق ازيا مەن تمد ەلدەرىنە، سونداي-اق تاياۋ شىعىس، ەۋروپا جانە ازيا مەملەكەتتەرىنە كەڭەيتۋ كوزدەلگەن. اتاپ ايتقاندا، ۆەنا، توكيو، ريم، ابۋ-دابي، ءار-رياد، داممام، لارناكا، اممان، سيان، شانحاي، ءۇرىمشى، قاشعار، ۆارشاۆا جانە باسقا دا باعىتتار بويىنشا رەيستەر اشۋ جوسپارلانۋدا.
ودان بولەك، ەلىمىزدىڭ ءىرى اۆياتسيالىق توراپتارىندا ينفراقۇرىلىمدىق جوبالار كەشەنىن ىسكە اسىرۋ جوسپارلانىپ وتىر.
«اتاپ ايتقاندا، استانا جانە شىمكەنت اۋەجايلارىندا ەكىنشى ۇشۋ-قونۋ جولاقتارىنىڭ قۇرىلىسى باستالادى، الماتى اۋەجايىنىڭ ىشكى رەيستەر تەرمينالى قايتا جاڭعىرتىلادى، سونداي-اق اقتاۋ اۋەجايىنىڭ پەررونىنا كۇردەلى جوندەۋ جۇرگىزىلەدى»،-دەدى سالتانات تومپيەۆا.
