تاۋەلسىزدىكتىڭ 30 جىلى ىشىندە شىمكەنت قالاسىنىڭ ينفراقۇرىلىمى قارقىندى دامىدى. ون جىلعا جوسپارالاناتىن جۇمىستار ءۇش جىل ىشىندە اتقارىلىپ، جول، اۋىز سۋ، كوگىلدىر وتىن ەل يگىلىگىنە بەرىلدى. وسىنداي جۇمىستاردىڭ ناتيجەسىندە حالىقتى اۋىز سۋمەن قامتۋ دەڭگەيى – 98 پايىزعا، گازبەن قامتاماسىز ەتۋ – 93 پايىزعا، ال ساپالى ەلەكترمەن قامتۋ كورسەتكىشى 97 پايىزعا جەتەتىن بولادى. جالپى، 2023 جىلعا دەيىن شاھار تۇرعىندارى 100 پايىز ساپالى اۋىز سۋعا، 100 پايىز تابيعي گازعا، 2025 جىلعا دەيىن 100 پايىز ساپالى ەلەكتر قۋاتىنا قوسىلادى.
كەز كەلگەن شاھاردىڭ شىم-شىتىرىق شارۋاسى بار. تۇتاس تىنىستايتىن مەگاپوليستىڭ تىرشىلىگى ءتۇرلى سالانىڭ ءساتتى قابىسۋىنا دا بايلانىستى بولادى. قالا مەن ونىڭ تۇرعىندارى ءۇشىن الەۋمەتتىك سالا دا، ەكونوميكا مەن مادەنيەت تە ماڭىزى. دەگەنمەن، كۇندەلىكتى تۇرمىستا ويىپ تۇرىپ ورىن الاتىن قاجەتتىلىكتىڭ ءبىرى ينفراقۇرىلىم ەكەنى داۋسىز.
شىمكەنت – قازاقستان بويىنشا اۋماعى ەڭ ۇلكەن قالا. ءۇشىنشى مەگاپوليس تەرريتورياسى 1 170 شارشى شاقىرىمدى الىپ جاتىر. قالاداعى شاعىناۋدان، ەلدىمەكەن، تۇرعىن الاپتاردىڭ ينفراقۇرىلىم جۇيەسىن ۇيلەستىرىپ، تۇرمىستىق قاجەتتىلىكتەردى جەتكىزۋ جاۋاپكەرشىلىگى ۇلكەن جۇمىس ەكەنى انىق.
اسىرەسە، 2014 جىلى شىمكەنتكە كورشى اۋدانداردان 42 ەلدىمەكەن قالا اۋماعىنا وتكەن سوڭ ينفراقۇرىلىم ماسەلەسىنىڭ وزەكتىلىگى ارتا ءتۇستى. ءبىر مەزەتتە قالالىق اتانعان جۇزدەگەن مىڭ تۇرعىندى سول قالا ءومىرىنىڭ يگىلىگى سانالاتىن گاز، ساپالى ەلەكتر جارىعى مەن تازا اۋىز سۋ، قالا بەردى كارىز جۇيەسىمەن قامتاماسىز ەتۋ مىندەتى تۇردى. العا وزا ايتار بولساق، جەرگىلىكتى بيلىك بۇل مىندەتتى ءتيىستى دارەجەدە اتقارۋدا. بۇل تۋرالى قالا اكىمى مۇرات ايتەنوۆتىڭ شىلدە ايىندا ورتالىق كوممۋنيكاتسيالار قىزمەتىندە وتكەن ءباسپاسوز بريفينگىندە مالىمدەلدى.
– وسىدان ءۇش جىل بۇرىن، 19 ماۋسىم كۇنى ەلباسى نۇرسۇلتان ءابىشۇلى نازارباەۆتىڭ جارلىعىمەن شىمكەنتكە رەسپۋبليكالىق قالا مارتەبەسى بەرىلگەن بولاتىن. بۇل تاريحي شەشىم شىمكەنتتىڭ تىنىسىن اشتى دەسەم، ارتىق ايتقانىم ەمەس. ەكونوميكا ءوسىمى قالا ينفراقۇرىلىمىنا دا قارقىن بەردى. 2019-2021 جىلدارى شاھاردا جالپى ۇزىندىعى 853,5 شاقىرىم جول توسەلەدى. بۇرىن مۇنشا جول 10 جىلدا سالىناتىن. بيىلدى قوسا ەسەپتەگەندە، سوڭعى ءۇش جىلدا، 18 تۇرعىن الابىنا اۋىز سۋ قوسىلىپ، 60 مىڭ تۇرعىن تازا سۋ تۇتىنىپ وتىر. ءۇش جىلدا 7 تۇرعىن الابى تابيعي گازعا قوسىلىپ، 29 500 ادام قىزىعىن كورىپ وتىر. ناتيجەسىندە، بيىل جىل سوڭىندا اۋىز سۋمەن قامتۋ دەڭگەيى – 98 پايىزعا، گازبەن قامتاماسىز ەتۋ – 93 پايىزعا، ال ساپالى ەلەكترمەن قامتۋ كورسەتكىشى
97 پايىزعا جەتەتىن بولادى. جالپى، 2023 جىلعا دەيىن حالىق 100 پايىز ساپالى اۋىز سۋعا، 100 پايىز تابيعي گازعا، 2025 جىلعا دەيىن 100 پايىز ساپالى ەلەكتر قۋاتىنا قوسىلادى، – دەگەن ەدى مۇرات ايتەنوۆ.
شاھار باسشىسىنىڭ مالىمدەۋىنشە، تۇرعىنداردى ساپالى اۋىز سۋمەن قامتاماسىز ەتۋ ءۇشىن 3 ماگيسترالدى سۋ قۇبىرى، 10 ەلدىمەكەنگە اۋىز سۋ قۇبىرى، 3 ماگيسترالدى كارىز قۇبىرى جانە 16 ىشكى ورامدىق نىسان، تابيعي گاز بويىنشا №3 اگرس جانە 2 ماگيسترالدى، 11 ەلدىمەكەنگە گاز قۇبىرى، 3 قوسالقى ەلەكتر ستانتسياسى مەن 15 ەلدىمەكەندە ىشكى جۇيەنىڭ قۇرىلىسى جۇرۋدە.
ەلدىمەكەن ينفراقۇرىلىمى دەگەندە، كوز الدىمىزعا، ەڭ الدىمەن، ەلەكتر جارىعى كەلەتىنى بار. راسىندا دا سامالاداي جارقىراعان كوشەلەر مەن عيماراتتار قالا كوركىن اشا تۇسەرى ءسوزسىز. بۇل تۇستا جالپى ايتا كەتەتىن جايت – شىمكەنتتە ەلەكتر قۋاتىمەن قامتاماسىز ەتۋ جولعا قويىلعان. الداعى ۋاقىتتا جاعداي بۇدان دا جاقسارىپ، قالالىقتار ساپالى ەلەكتر قۋاتىنا قول جەتكىزە الادى. ولاي دەيتىنىمىز، تامىز ايىندا شىمكەنت ءۇشىن ماڭىزدى ەنەرگەتيكالىق نىسان – بوزارىق قوسالقى ستانتسياسى ىسكە قوسىلدى.
ناتيجەسىندە
250 مىڭعا جۋىق تۇرعىن ساپالى ەلەكتر جارىعىنا قول جەتكىزە
الادى.
سالتاناتتى اشىلۋ راسىمىنە قالا اكىمى مۇرات ايتەنوۆ تە قاتىسقان وسىناۋ ستراتەگيالىق نىساننىڭ قۇرىلىسى 2015 جىلى باستالعان ەدى.
– قۇرىلىس تولىق اياقتالىپ، بىرنەشە تاۋلىك بويى ستانتسياداعى ترانسفورماتورلار مەن اگرەگاتتارعا جوعارى كەرنەۋلى ەلەكتر قۋاتى بەرىلدى، سىناق جۇمىستارى ءساتتى ءوتتى. شاھار ينفراقۇرىلىمى ءۇشىن اسا ماڭىزدى بۇل نىسان مەملەكەت باسشىسىنىڭ تاپسىرماسى اياسىندا جۇزەگە اسىرىلدى. بوزارىق قوسالقى ستانتسياسى قالانىڭ بازالىق ەنەرگەتيكا كەشەنى سانالادى. ەندى الداعى ۋاقىتتا بۇل ەلەكتر ستانتسياسىنا 5 قوسالقى ستانتسيا قوسىلىپ، ەلەكتر ەنەرگياسىن الادى، – دەدى شىمكەنت قالاسىنىڭ ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى بورانباي بولاتبەكوۆ.
قازىرگى تاڭدا «ءنۇرسات»، «استانا-1» جانە «استانا-2» قوسالقى ستانتسيالارىنداعى جۇمىس اياقتالىپ قالدى. ال «1-م-1» ستانتسياسىنداعى قۇرىلىس جالعاسىپ، «ىنتىماق» قوسىلقى ستانتسياسىنىڭ جوبالىق-سمەتالىق قۇجاتتارى ازىرلەنۋدە. ناتيجەسىندە، قالانىڭ سولتۇستىك بولىگىندە ورنالاسقان اسار-2, تۇران، ىنتىماق-2, سولتۇستىك ساياجاي، باتىس، بوزارىق، قايناربۇلاق، شىمكەنت سيتي، دوستىق جانە ءنۇرسات – بارلىعى 10 شاعىناۋداندى ساپالى ەلەكتر قۋاتىمەن قامتۋ مۇمكىندىگى تۋادى.
